Lawngtlai-III lei tlak hniamna huam chhunga National Highway-54 kawngpui kal chu nizan ruahsur nasat lai, dar 8 vel khan chim belhin, lirthei eng chi mah kal tlang theih lohvin khar nghal a ni a. He lai hmun hi nizan leh tukin khan Lawngtlai East bialtu MLA Pu H. Biakzaua chuan tlawhin, official-te leh khawtlang hruaitute nen hma lak zui dan tur an sawi ho.

 

Tukina hma lak dan tur relnaah hian MLA bakah, bialtu MDC Pu T. Lalengmuana leh Lawngtlai-III khawtlang hruaitute leh YLA hruaitute, sawrkar official lam atangin Addl DC Pu B. Lalchhawntluanga, Addl SP Pu C. Lalruatkima leh PWD leh PHE department ai awhte an tel a. Lei tla hniam huam chhunga kawngpui awm sa chu lirthei tan zawh ngam a nih loh avang leh chhim lam tana kawngpui pawimawh tak a nih si avangin, kawng chhak lama mimal ram chu la hekin, lirthei kal theihna turin siam phawt ni se, an ti a. Kawngpui zauh hna hi vawiin khan thawh nghal a ni.

 

Nizana kawng a min belh veleh Lawngtlai SP chuan he lai National Highway-54 kawngpui hi thu leh awm hma chu lirthei tan pal tlang theih loh turin hriattirna a chhuah nghal a. Kawngpui hi khar ni mah se, hmar lam atanga lirthei tlan tan AOC Venga Mizofed Filling Station atangin Electric Veng lamah hel theih a ni a, chhim lam atanga kal tur tan Bazar Veng leh Chandmary Veng atangin DC Office panna kawng lamah hel theih a ni bawk.


He lai lei tla hniam hi kum 1995 May thla atanga intan niin, kum tin fur laiin a che thin a. Sawrkar atangin a venna tur ngaihtuah reng niin, kum 2012 khan lei tlak hniamna mawng Khurpui kawr atangin check dam siam a ni a. Hei hian thui tak chu veng bawk mah se, ruah sur nasat laiin a che leh hret hret thin a. DM&R leh department dang atang paw'n lei tla hniam venna tur leh he lai kawngpui leh a vel thuam that hna hi thawh chhunzawm deuh reng a ni a. Tun dinhmunah he lei tla hniam hian Electric Venga in 18 leh Lawngtlai-III huam chhunga in 10 a nghawng a ni.

Attachment

  • Loading attachment...