Vawiin khan Agriculture Minister Pu C.Lalrinsanga chu Muallungthu Community Hall-ah Khuallian niin Aizawl South III chhunga lo neia eizawng tute Awareness Campaign on Enhancement and Value Addition of Agriculture Produce a hmanpui a. Horticulture Development Board Vice-Chairman leh Aizawl South III Bialtu MLA ni bawk Dr. F.Lalnunmawia chu Khualzahawm a ni.

Khuallian Pu C. Lalrinsanga chuan loneitu duhawm tak tak kalkhawmte chungah lawm thu a sawi a. Aizawl District Agriculture Office Staff ten awareness programme pawimawh tak ruahmanna an siamah lawmthu a sawi bawk a ni. Khuallian chuan hlo hlauhawm hmang leh damdawi tello a lo neih, 'Organic Farming' chu Mizoram loneitu ten uar zel ila, khawpui chawmtu nih tum a ngai a ni, tiin a sawi a. Mizorama mihring tam zawk awmna, Aizawl ah hmundang atangin thlai lak luh a ni a, sum nasa tak a luang chhuak a, hemi chungchanga Mizoram mamawh hi hrethar leh ila, Organic Farming chu Mizorama lonei tute tih theih reng leh a bikin Aizawl hnaih lama awm ten an tih reng a ni a, mumal taka Organic Farming kalpui a nih nan pawh Mizoram sawrkarin Organic Farming Act a neihsa pawh kaihthawh thar leh a ni ang, tiin a sawi a ni. Mizorama lo neitu ten hlawhtlinna an theih nan Link Road mamawhna te pawh Sawrkar chuan a hria a, hma a la zel bawk ang, tiin a sawi a ni.

Khualzahawm Dr. F.Lalnunmawia pawhin thu sawiin ei leh bar zawnna kawnga loneitu te tan hlawk zawk leh mumal zawka hmalak a nih theihnana awareness campaign buatsaih chu lawm awm a ti a, Agriculture Department chungah abikin lawmthu a sawi a ni. Khualzahawm chuan khawvel hmun changkang zawkte en chuan rual awh a na hle mai a, Mizoram a loneitu te mamawh ber chu rilrua hmasawn duhna leh thil thar zir duhna hi a ni, a ti a. Sum aiin thiamna neih a pawimawh zawk avangin vawiin awareness campaign chu loneitu kalkhawm ten tangkai taka an hman theih nan duhsakna a hlan a ni.


Chawhnu lamah hian Topic pathum Value Addition in Agriculture Produce, Sustainable Farm Planning for Small & Marginal Farmers, Marketing Chain for Agricultural Produce tih te zir ho a ni.

He hun hi Lalsanglura Sailo, DAO Aizawl District in a kaihruai a, Minister hi Department a thawktu te leh midang ten an tawiawm bawk a ni.