No.4314/2021-2022

Aizawl 17th March 2022: Vawiin chawhnu khan OM OM Modern Rice Mill, Pangbalkawn, Kolasib hawnna hun hman niin Pu C.Lalrinsanga, Minister, Agriculture Department chu khuallian a ni a. Rice Mill hawnna hun hi Pu J.Hmingthanmawia, IAS, Secretary, Agriculture Department chuan kaihruaiin Kolasib Assembly Constituency bialtu MLA Pu K.Lalrinliana, Minister, Food, Civil Supplies & Consumer Affairs Department chu khual zahawm a ni.

Agriculture Minister Pu C.Lalrinsanga chuan OM OM Modern Rice Mill neitute chu ram hmangaihna leh intodelh duhna thuk tak avang chauh a tihlawhtling thei an nih thu sawiin an inpekna chu fakawm a tih thu a sawi a. Ram hmasawnna tur chuan mahni hmazawn a mawhphurhna țheuhte rinawm tak a tihpuitlin zel tum hi a nih thu a sawi. Kolasib district chhung a leilet leh huan awmte chu ram pawn mi ni lovin a ram neitu dik tak ten țangkai tak a an hman a, a hlawkna pawh a ram neitute ngeiin an tel theih nan Agriculture Department chuan hma a lak zel thu a sawi a, hemi tihlawhtling tur chuan huaisen tak a ke pen a țul thu a tarlang bawk a ni. Hnianghnar tak a thlai thar chhuah a nih theih nan Irrigation & Water Resources Department kaltlangin hmun engemaw zatah Solar Water Pump bun tum a nih thu Agriculture Minister chuan a sawi a, hei hian thlai kan intodelhna kawngah nasa takin thlai chingtute a puih a rin thu a sawi bawk a ni. Pu C.Lalrinsanga chuan dan mumal tak hnuaiah a huhoin loneitu intelkhawm (Farmer's Producer Organization) kaltlangin hlawk zawk leh țhahnem zawk a buh leh thlai thar kalpui tum a nih thu sawiin tunlai thiamna hman țangkai zel tum a nih thu leh buh chi țha RCM-10 pawh hlawhtling tak a enchhinna kalpui a nih tawh thu a sawi bawk a ni.

Supply Minister Pu K.Lalrinliana chuan buh chinna hmun țha kan neih ang angte chu țangkai tak a hman a țul thu sawiin loneitute hlawk zawk nan sangha khawi nen a kalpui dan enchhin mek a nih thu a sawi bawk a ni. Om Om Modern Rice Mill hlawhtlinna chu loneitute leh kuthnathawktute kut ah thui tak a innghah thu sawiin kan ram intodelhna hmanraw pawimawh tak a nih ngei theihna turin țangkai tak a hmang turin kalkhawmte a chah a ni.

He hunah hian Pu James Lalsiamliana, Director, Agriculture Department leh Pi Vanlalhriatrengi, Secretary, Corban Pvt.Ltd te chuan Technical report pein Pu Lalsawma Pachuau, Joint Director, Food & Drugs Administration chuan thusawina hun an hmang a, Pi Runremsangi, OM OM Modern Rice Mill neitu chuan lawmthu sawina hun a hmang bawk a ni.

Technical report-a tarlan danin kum 2016-17 khan Mizoram Sawrkar hnuai ah NEDP kaltlangin Modern Rice Mill bunna tur hian Cheng Nuai 80 pekchhuah a ni a, Transformer bun nan hian Cheng Nuai 33.61 SEDP hnuai ah pek a ni bawk a ni. Heng bak ah hian Mizoram Rural Bank hnuai ah loan Cheng Nuai 445 hman a ni a, a neitute hian an mahni sum Cheng Nuai 132 an seng tawh bawk a ni. Om Om Modern Rice Mill hi darkar khat a 5 Ton her thei tur a ruahman a ni.