1133/2023-2024

Vawiin hian Agriculture Minister Pu C Lalrinsanga chuan School of Agricultural Science, Hnahthiala building sak thar pathum - Class Room cum Lecturer Hall nuai 350 senga sak, Administrative building nuai 150 senga sak leh Girls Hostel nuai 150 senga sakte a hawng. Heng Building-te hi NABARD sum atanga sak a ni.

Hawnna inkhawm SAS Complex, Hnahthial-ah hman nghal a ni a, Pu James Lalsiamliana, Director Agriculture Department chuan a kaihruai a. Pu Lalchhanliana Executive Engineer, Agriculture Department-in technical report a pe bawk a. Pu George Lalthanngura, Principal-in lawmthu sawina hun a hmang bawk.

He inkhawmah hian Agriculture Minister Pu C Lalrinsanga chuan thusawiin, "School of Agricultural Science hi Diploma Course tal a nih theihna tura hma la a, upgrate a ni ta hi lawmawm ka ti tak zet a. Research tel lo chuan crop husbandry hi hlawhtling takin a kal thei lo. Khawvel sik leh sa inthlak zelah hlawk zawka thlai thar a nih theih nan zirchianna leh enchhinna hi a pawimawh lehzual ta hle a ni. Chumi atana pawimawh tak pakhat building heti zat hawn thar a ni ta hi lawmawm ka ti hle a ni," a ti.

Minister chuan SAS zirlai kalkhawmte fuihin, "Tuna in zirlai hi hneh hle rawh rawh u. Thiam tak tak tumin bei rawh u. Practical kan uar chho zel dawn a, chawn phiar tawng tawng a chhawr che u kan tum a ni. In theihna tak tak sawrchhuah kan tum a ni," a ti a. "Chief Minister Pu Zoramthanga kaihhruaina hnuaiah hripui leng leh chhan dang dang vangin khaihlak awm mahse, nasa takin hma kan sawn zel a ni," a ti bawk.

SAS Complex-ah hian Minister leh official-te hian thing a phun nghal bawk a ni.