1134/2023-2024

Aizawl, 14.07.2023: Mission Foundation Movement hmalaknaa Reiek RD Block chhunga Start-up Entrepreneurship Development Programme (SEDP) model project kalpui dan leh hlawhtlinna hmuh documentary siam chu vawiin khan Chief Minister Pu Zoramthanga chuan CM office conference hall-ah a tlangzarh. Social Welfare Minister Er. Lalrinawma chuan he hun hi a kaihruai a ni.

Chief Minister chuan Mission Foundation Movement hmalakna chu fakawm tiin, mahni kutkawih a eizawnna kawnga hmasawnna thlen tura thehnemngai taka hma lak chu pawimawh a tih thu a sawi a. Kuthnathawh chu eizawnna hlawhtling a nih theih zia chiang mah ila ram pum hmasawnna tur atan chuan hman atanga tih phung a lo neih tawhte kalsan a tul thin thu sawiin Chief Minister chuan tharchhuah a lo tam zawk nan a a remchanna apianga khawl tha hman te, man man zawka thil tharte hralh a nih theih na tura phurh man (transport cost) a hniam theih nan kalkawng siam belh a siamthat te, hlawk zawka tharchhuahte hralh theih nan sawngbawl (processing) hmasak phawt leh adangte chu ngaihtuah tel vek a tul thu a sawi a; chutiang atan chuan hma pawh sawrkarin a lak thu a sawi a. Sawrkar chuan engkim a vaihma vek tur ni lo in, a theih chin chinah privatization kalpui chu a that thu leh sawrkar chuan remchanna siam a, mimal emaw pvt firm in amaha a tih theih loh hna liantham chu a thawh tur a nih thu a sawi. Chief Minister chuan Mizoram hmasawnna atan chuan kan rama kan neih sa, a awm sa hi hmang tangkaiin kan haichhuah a, remhriatna, taimakna leh tumruhna nen ram hmasawnna hna chu tihlawhtlin theih a nih zia a sawi a. Buh a intodelhna tur ram zau tak a awm thu te sawiin, ruahtui dawhkhawl hmanga kumtluanin kan lo leh huante hi tangkaia hman a nih theih zia te a sawi a. A taka tumruh leh dawhthei taka bawhzui thiam a pawimawh thu a sawi a ni.

Hun kaihruaitu Minister Er. Lalrinawma chuan mahni kutkawih a eizawnna in hma a lo sawn zel theihna tura hmalakna hrang hrang awm chu lawmawm a tih thu sawiin, vawiina documentary tlangzarh chu a bultanna chuah a nih a, hmasawnna zau zawk a lo awm zel a beisei thu a sawi a ni.

Start up Entrepreneurship Development Programme hi Ministry of Tribal Affairs, Govt. of India in kum 2019 - 2020 chhunga SCA to TSS scheme hnuaiah Social Welfare Department kaltlangin Cheng Nuai 335 a rawn sanction a ni a. Reiek RD Block, Mamit District (Aspirational District) huamchhunga chhungkaw 300 (Existing Entrepreneur 120 leh New Entrepreneur 180) ten tanpuina hi an dawng a ni.

Implementing agency hi Mission Foundation Movement niin, National Rural Livelihood Mission, Ministry of Rural Development, Govt. of India hnuaiah Start up Village Entrepreneurship Development programme kalpui tura rampum huap a Empanelled list a thlan niin, Kolasib Dist ah SVEP Project hi a kalpui mek a, Mamit (Aspirational Dist) hnuaia kalpui tur hian DPR buatsaihin Department kaltlangin central sawrkar hian a rawn approve ta a ni.

MFM hi firms and society hnuaia 2004 khan registered niin Public health, Skill Development, Rural Livelihood, Women empowerment, Para medical course leh adangte kalpuiin central sawrkar leh foreign agency USAID, JICA te kaltlangin hna a thawk mek a, Project kalpui lai 21 neiin thawktu pawh 120 kan awm mek a ni.

Project hi BDO Chairman na hnuaiah Committee member 12 awmin, Baseline survey leh Interview kaltlangin Beneficiary tur hi a thlang chhuak a. Baseline survey chu mobile application geo tagging hmanga neih niin surveyor te hian a hmun ah kalin an dinhmun zirchianna an nei vek a, chipchiar taka thla lak vek a ni.

Eligibility Criteria ah chuan RD block huam chhung a mi a ni tur a ni tih niin, SHG member an chhungkua ah an awm leh BPL family member leh MNREGA card holder te thlan an ni.

Selection: Tanpuina tehfung ruahman hmanga tling Applicants zingah short listed ten Personal Interview an hmachhawn vek a, Committee in uluk takin a thlangchhuak leh a ni.

Residential Training on Business Management : Beneficiary tura thlan te hi kar hnih chhung Residential training Berawtlang ah neihpui niin Mithiam hrang hrang ten zirtirna an pe a, assessment an paltlang leh vek a ni.

Exposure Visit : Beneficiary thlanchhuah te hian an trade mi ah field visit neihpui vek an ni.

Tanpuina hi a pawisa fai niloin, an trade thlan mil hnathawhna bungrua pek an ni a, trade a zirin Item 3 - 5 vel zel an dawng a ni. Existing Entrepreneur mi 120 ten Rs 45,000/- hu bungrua an dawng a, New entrepreneurs mi 180 te Rs 65,000/- hu bungrua pek an ni thung. Group ti tha Lushai Organic Reiek hnenah Rs 100,000/- pek an ni bawk.

Monitoring: Project hi kum khat chhung kalpui a ni a, hand holding support uluk taka pek niin, sumdawnna kawnga harsatna an tawh te a theih ang ang kaihruai in, chhungkaw tam tak in an sum leh pai lakluh a lo tam phah tih hmuh a ni.