1132/2023-2024

Vawiin khan Saitual District  Sericulture Office chu  Sericulture Minister Er. Lalrinawma'n a hawng a.  Pu C. Lalmuanpuia ,MLA, Veterinary, Fishery & Sericulture Board Vice Chairman chuan he hun hi khualzahawm niin a hmanpui bawk.

Hawnna inkhawm Saitual College Auditorium a neihah hian Sericulture Minister, Er. Lalrinawma chuan thu sawiin Saitual District lo changtlung chho zel chu a lawmawm hle a ni, a ti a, thil ropui tak te pawh thil te tham te atanga in tan a nih thu sawiin, District lian leh thangduang tak annih theih nan duhsakna a hlan.

Minister chuan Sericulture chu Department lian tak nilo mahse a ngialnghet tha a ni, a ti a. Mihring in  thil bulpui pathum a mamawh; chenna, chaw leh silhfen zinga mi a ni, a ti a, chuvang chuan Sericulture Department leh an hnathawh te chu mihring te nitin nunphung a bet tlat a ni, a ti.

Er.Lalrinawma chuan Mizoram ah eizawnnan thil chi hrang hrang kan ching a, amaherawhchu a dah thatna te kan neih that tawk loh avangin a hralh chhuah leh tihralna lamah harsatna kan tawk thin a, Sericulture hmanga eizawnna erawh demand awm reng, a thar chhuahna lamin a phuhruk theih loh khawp a mamawhna sang a ni, a ti.  India hmarchhak chu Silk tha leh manto ‘Muga Silk’ chinna atana duhthusam a nih thu leh Mizoram sik leh sa leh ram leilung chu pangang khawi nan a in rem em em a ni tih sawiin, sericulture leh a kaihhnawih  eizawnna chu mi tam zawk in eizawnnan  hmang thei se a beisei thu a sawi bawk.

Khualzahawm Pu C. Lalmuanpuia MLA pawhin  Pangang vulh hlut zia sawiin, India chu Saree kaih hnam kannih  avangin Silk pangang hmanga puanthan siamchhuah te demand a sang hle a, a supply in a daihlo zawk a ni, a ti.

Mithiamten pangang hmanga Silk siam chu mihring tan a hrisel in allergy nei te tan pawh a him an tih thu sawiin, kuthnathawka ei zawng ten  hlawhtlinpui tlak a eizawnna tling a an hman a duhsak takzet a ni, a ti.

Saitual DC, Dr Lalngura Tlau pawh in thu sawiin tun hnaiah Saitual District ah Department hawn belh nual anih thu leh karleh lamah District Veterinary Office hawn tum a nih thu a sawi nghal a.  Sericulture in Office an hawng thar chu District hmasawnna hmel ti lang tu pawimawh tak pakhat a ni, ati.

Hawnna inkhawm hi Sericulture Department Secretary Pu C. Lalrosanga chuan a kaihruai a. Pu R lalbiakthanga principal STI Zemabawk in report a pe a, Dr Lalthlamuana Pachuau, Sericulture scientist in lawmthu sawina a neih hnu in hawnna inkhawm hi khar a ni.

Saitual District Sericulture Office hi NABARD (RIDF XXVI) hnuaia sum hmuh atanga sak a ni a. Building hi chhawng hniha sang niin Cocoon Storage Center, District Sericulture Officer room, Computer Room leh Establishment Room te a awm a ni.