1131/2023-2024

Lunglei the 13th July, 2023 - Vawiin chawhnu khan Agriculture Minister leh bialtu MLA ni bawk Pu C. Lalrinsanga chuan Lunglei Government College Auditorium cum Annexe Building thar a hawng.

Hawnna inkhawm Pu C. Zairemthanga, Vice Principal, LGC kaihhruaiah Pu C. Larinsanga chuan amah ngei pawh zirlai alo nih thin tawh na Lunglei Government College chuan hmasawnna ruhrel thar tha tak an nei chu lawmawm tiin Auditorium cum Annexe Building thar chuan an hnathawhna leh an zirna ah te nghawng tha tak a neih ngei a beisei thu a sawi a. Zirlai kalkhawmte chu an thil tih apiangah Pathian hnaih tur leh ruihhlo laka fihlim tlat tura chahin an zirnaah tum mumal nei a, chhungkua, khawtlang leh ram tana chhawr tlak nih tum turin Minister chuan chah a. Zirlaite chu Mizo hnam ziarang leh kan history te ngai hlu a, hun lo kal zel turah kan ram leh hnam chawi sangtu ni thei turin tan la turin a chah bawk a ni.

A sawi zelnaah Minister chuan Mizoram Youth Commission, LESDE leh Department dangte kaltlangin sawrkar chuan thalaite tan zirna leh entrepreneurship lamah te scheme tha tak tak a ruahman thu sawiin heng scheme te hi ngaihvena, lo hmang tangkai ve turin zirlaite chu a chah a. Lunglei Government College ruhrel mamawh dangte pawh Special Assistance to States for Capital Investment (SASCI) scheme kaltlanga buaipui sak a tum thu sawiin Building thar tha tak an neih chu duat leh uluk taka enkawl chhunzawm turin a chah bawk a ni.

PWD Lunglei Building Project Division EE Er Malsawmdawngliani chuan Technical Report a pe a. Lunglei Government College Auditorium cum Annexe Building hi Mizoram sawrkar Special Plan Assistance (SPA) cheng nuai 472.22 senga sak a ni a. 16.10.2016 ah khan hna bultan a ni a. He building sak hna thawktu contractor Pu Lalrintluanga Punte in vanduaithlak taka a boral san hlauh avang leh Covid-19 hrilen hun laia LGC building hi Covid Care Centre leh Containment Zone a puan anih tak avangin a hna hi thawh chak theih anilo a ni. A building hi floor hnih niin a zau zawng total floor area hi 1563.33 square metres a ni a. Basement floor ah hian Cafateria, kitchen, table tennis hall, girls common room, lobby, toilet pariat (8) leh litre nuai 1 len na RCC Rainwater harvesting na a awm a. Ground floor ah hian auditorium, toilet panga (5), storeroom leh changing room pahnih (2) a awm a ni.

LGC Principal Pu LH Rothanga pawhin thu sawiin Pu Lalrammuana Chawngthu, Associate Professor LGC in lawmthu sawina hun a hmang a ni.

Lunglei Government College hi September 10, 1964 ah din niin tin dinhmunah Arts Stream subject pariat (8) leh Science stream subject paruk (6) zirna a awm a. Zirlai 1100 leh teaching staff 68 an awm mek a. Mizoram University Final Semester result 2023 khan result tha tak neiin Top Ten rank an neih te chu:

Department of Geography - 1st Rank leh 9th Rank

Department of Economics - 2nd Rank

Department of Botany - 2nd Rank, 9th Rank leh 10th Rank

Department of Physics - 8th Rank leh 10th Rank

Department of Zoology- 2nd Rank