Vawiin khan Govt.J.Thankima College chuan VARTIAN ’19 (Management-Tech Meet) ni hnihna an college-ah an hmang a, Agriculture Minister Pu C. Lalrinsanga chu Khuallian a ni.

Minister Pu C. Lalrinsanga chuan thalaiten thil kalphung ngaia kan neih tawhte a tha zawnga thlak danglam kan tum tur a ni a, chumi atan chuan ngaihtuahna kan sen peih a ngai a ni tiin mahni thiamna hmang ngeia eizawnna nei turin ke kan pen a hun tawh a ni, a ti a. Kan rilru pawh kan her danglam hret hret a tul a, sawrkar hna ringawt ni lovin kawng hrang hrangah hnathawh tur a awm a ni tih i hre thar leh ang u tiin kalkhawmte chu a chah a. Kan ramah hian mahni thiamna hmanga eizawnna kalpui theih tur hi a tam viau a, kan haichhuah peih a ngai a ni, a ti a. Kan ram leilung hausakna hman tangkai tur te, kan thlai leh thei tharchhuah hmanga kan siamchhuah theih te hi a tam hle a ni, a ti a. Thangthar zawk ten mahni ke ngeia an dinchhuahpui theihna tur thiamna hi kan ramin a mamawh berte zing ami a ni, a ti a. Minister chuan Govt.J.Thankima College in hetiang lama mi hlawhtlingte leh zirlaite inkawmhona tha tak a buatsaih chu lawmawm a tih thu sawiin zawngchhang tlak tak a nih thu a sawi a. Zirlaite hnenah chuan beiseina sang tak nen hmalam kan thlir a tul a, ‘ka tithei a ni’ tih rilru put hi a pawimawh hle a ni, a ti.  

Govt. J. Thankima College hi 1992 khan din tan a ni a, a hnuah Lalhmingthanga College nen insuihfin a ni a, tuna an awmna Central Campus, Bawngkawnah hian kum 2017 khan an awm tan a. Tunah hian teaching staff 28 leh non-teaching staff 13 an awm a, zirlai 612 an awm mek a ni. Management –Tech Meet Vartian ’19 hian ni hnih a awh a, nimin khan tan a ni. Vawiin hian Angels Business Promoter Adviser & COO Pu Rinzuala, Designer Pi Afaki Hauhnar leh Sunrider atangin thusawi ngaihthlak a ni a. Chawhnu lamah hian interaction program neih a ni dawn a, entrepreneurship lama mi hlawhtling tak tak in thusawina hun an nei dawn a ni. Sumdawngten an thil zawrh leh siamte an phochhuak a, stall 13 a awm a ni.