Nimin khan Lunglei West bialtu MLA leh Agriculture, Irrigation & Water Resources leh Cooperation Department changtu Minister ni bawk Pu C. Lalrinsanga chuan Lunglei District-a Phairuangkai, Putlungasih leh Zawlpui khua te a tlawh. A zin kual naah Minister chuan kuthnathawktute leh Department hotute kawmin kuthnathawktute dinhmun chawikang tur leh ei leh bara intodelhna kawnga hmalak zel dan tur te a sawipui.  

Zawlpui Kau Kam Zau-a ‘Farmers Meet’ ah Minister chuan thu sawiin ei leh bara kan intodelh loha ram dang mite kuta kan innghah lutuk chuan kan hnam zia pawh hian a ral phah thei a ni tiin tih takzeta kan beih a tul a ni, a ti a. Kuthnathawktuten an tharchhuah awlsam zawka an phur chhuah theihna turin sawrkarin Link Road a ngai pawimawh takzeta, Link Road thar siam tur leh a awmsa te ti changtlung turin hmalak thuai a nih tur thu kalkhawmte a hrilh bawk a ni. Kuthnathawktute inkarah tanrualna leh thawhhona tha a pawimawh thu sawiin Agriculture Department hnuaiah ‘Cooperative movement’ uar taka kalpui a nih tur thu a tarlang bawk. Zawlpui chu Lunglei District chhunga nul hmun tha leh thlai dang chinna hmun tha a nih angin thlaia intodelhna tur a hmalakna tlak a ni a ti a, helai hmuna Serthum chingtu te chu Drip irrigation hmanga tui pe turin ruahmanna siam a tum thu a sawi a. Minister chuan nul thlai bakah fu uar zawka chin a tul thu sawiin Chini a intodelh tura hmalak a nih tur thu a sawi a. Mipui eiral tam ber Alu, Purun leh Dailuah (Dal) ah kan tharchhuah hmang ngeia intodelh turin hma lak a nih tur thu a sawi a. A sawi zelnaah Minister chuan tun sawrkarah hian mi taima leh dinchhuah tum tak takte tan dinchhuahna tur a tanpuitu sawrkar nih kan tum a ni a ti a, kuthnathawktute pawhin rinawmna leh taihmakna nen kan thawh a Pathian kan tih a pawimawh hle a, chu chu hlawhtlinna bul a ni a ti bawk.

He hun hi Lunglei DAO Pu Tlangtimawia Zote in a kaihruai a.  Minister hian Zawlpui khua te thlai phurchhuahna kawng Kau Suspension Bridge kum 2017 June Ni 12 a tui lianin a tih chhiat chu en nghalin a rang thei ang bera siam that hna thawh a nih tur thu a sawi a ni. Zawlpui khua hi Lunglei khawthlang lam a awm niin In 360 khua a ni a,  Kau lui kam zawl leitha ah nul leh thlai dang hmun siamin chhungkaw 300 chuangin eizawnnan an hmang mek a ni.

Minister Pu C.Lalrinsanga hian Phairuangkai a Ruchi Soya Company ten Oil Palm herna khawl (Mill) an bun na tur hmun tlawh nghalin Ruchi Soya Company thawktute nen mill bun chungchanga an harsatna te an sawi ho a, Lunglei khawthlang lama Oil Palm chingtute mamawh ber a nih avangin Oil palm mill chu bun a nih thuai theih nan hmalak a tum thu a sawi bawk. Minister hian Phairuangkai khuaa Government Dinthar Middle School leh BCM Comprehensive School te pawh tlawhin helai hmuna thawktute hian an harsatna leh mamawhte lo thlenin, a tul anga hmalak sak a tum thu Minister hian a sawi.

Minister hi Lunglei DAO Pu Tlangtimawia Zote, Lunglei DIPRO Pi C. Lalremruati, SDAO Pu Ngurrinsanga Sailo leh Pu C. Malsawmkima, I&WR SDO Er K. Lalsangzuala, Lunglei MJA hruaitute leh party hruaituten an tawiawm a ni.