Mizoram State Museum, Art & Culture Department buatsaih Museum Week chu vawiin January 21, 2019 khan hman tan ani a, January 25, 2019 (Zirtawpni) ah khar ani ang. Museum Week chhung hian nitin chawhma dar 10:00 atanga tlai dar 3:30 thleng mipui tan Museum chu en man awm lovin an hawng dawn a, mi zawng zawng Museum en turin an sawm. Tin, Museum Week hmang tur hian College hrang hrang 9 (Panga) heng – Govt. T. Romana College, Govt. Johnson College, Govt. Hrangbana College, Govt. Aizawl West College leh Pachhunga University te an sawm a, anni bakah hian Mizoram Sawrkar hnuaia zirna in – High School leh Middle School engemawzat an sawm bawk. Museum week hi kum 2004 atang khan kumtin February thla chawlhkar tawp berah hman chhoh thin ani a, Museum Week a hlawhtlin lehzualna atan hian Zirna In te ngaihpawimawh an ni thin a, kuminah hian zirna in hrang hrangte an kal tan hun leh an exam hun tihdanglam a awm tak nual avangin January thla-ah Museum Week hi hman ani ta a ni.

Museum chi hrang hrang awm zingah Mizoram State Museum hi Multipurpose Museum a nih avangin a hlutna hi a sang bik a, tlawh a manhla em em a ni. Mizoram State Museum hi 2017-2018 sawrkar kum chhung khan tlawhtu mi 9130 an nei a, museum en man atangin sawrkarah Rs. 50020.00/- an chhunglut a, museum tlawt tu zinga mi 10 te hi Foreigner an ni a, mi 24 hi VIP leh VVIP an ni bawk. Sawrkar kum kan hman mek April 2018 atanga vawiin ni thleng hian tlawhtu mi 8211 an nei tawh a, sawrkarah Rs. 33,620.00/- an chhunglut tawh a, kum kal mekah hian museum tlawh tu zinga mi 61 te hi Foreigner an ni a, mi 21 te hi VIP leh VVIP an ni.

Mizoram State Museum ah hian Gallery 6 (Paruk) a awm a, Mizoram State Museum hian Museum objects 3757 lai a la khawm tawh a, heng zinga 933 te hi show case chi hrang hrang 107-ah pho chhuah a ni a. A bak zawng hi reserve collection-ah dah a ni. Tribal Museum, Ranchi-ah te, Bhopal Museum ah te, Silpigram Museum, Guwaha-ah te, Jawaharlal Nehru Museum, Itanagar-ah te Mizo hnam hmel lanna Museum objects engemawzat thawn (donate) a ni tawh a, Assam Rifle hmunpui Shillong-a Museum buatsaih torah Mizo hnam hmel lanna Museum Objects an neih theih nan theihtawp chhuah a tanpui an tum mek bawk.

Ni bika a thlawna Museum en theih ni tih lohah chuan Museum tlawhtu an tam lem lova. Ni bik, a thlawna Museum en theih hunah entu an tum em em thin a. Chung nit e chu ‘Museum Week’ leh ‘International Museum Day’ te an ni. Entry Fee hi puitling pakhat tan Rs. 20/- leh naupang pakhat tan Rs. 10/- a ni a. School naupang zirtirtute hruaia educational trip-a lokal te chu 50% concession pek an ni a. Tin, kum upa, kum 65 chin chunglam te chu en man chawitir an ni lo bawk. Tin, ram pawn atanga local foreign visitor-te en man atan Rs. 50/- lak ani bawk. Museum hi March-September thla inkar chhung zawng chu dar 10:00 am – 4:00 pm ah hawn thin ani a, October – February chhung chu dar 10:00 am 3:30 pm ah hawn ani thung. Tin, chawlhkar tin Thawhtanni apiang hian chawhma lamah thawhtuten Gallery tihfaina hun an hmang thin a, chuvangin Thawhtanni-ah chuan Dar 1:00 pm ah Museum hi hawn thin a ni a. Tin, Inrinni hian dar 10:00 am – 2:00 pm chhung Museum hawn thin a ni. Sunday leh Sawrkar Holiday-ah te chuan Museum khar thin a ni.