Vawiin khan Kamalanagar-a CADC Rest House-ah Pu Rasik Mohan Chakma chu Chakma Autonomous District Council (CADC) Chief Executive Member (CEM) atan lak luh a ni. 

He hunah hian Mizoram AH & Vety Minister Dr K. Beichhua, CADC-a member-te, CADC leh state sawrkar hnuaia official-te, political party lam leh tlawmngai pawl ai awhte an tel a. Lawngtlai Bawrhsap Pu N. Chakhai MCS chuan CEM atan rinawmna thu a tiamtir a ni.

Pu Rasik Mohan Chakma chuan amah lak luhna hun hriatpui tura state sawrkarin Minister a rawn tir chu lawmawm a tih thu sawiin, a kaihhruai sawrkar tharin a ngaih pawimawh ber tur chu mi tin huap zo sawrkar ṭha din a ni, a ti a. Zirna, ei bar zawnna, khawtlang nun leh kawng hrang hrangah hma sawnna hmel hmuh tur a awm zel ang tiin, party bil induhsakna leh phuba lakna lam ni lovin a ṭha zawnga inthlakthleng chu an sawrkar hna thawh dan tur a ni, a ti a. Khawvel hmun hrang hranga Chakmate hamṭhat nan leh CADC huam chhunga hnam hrang hrangte inkara inremna leh inzah tawnna a awmm theih nan hma an lak tur thu a sawi bawk.

January ni 18, 2019-a floor test buatsaihah CADC sawrkarna siam tura thlawptu a ngah tawk avangin opposition leader ni lai, MNF party mi Pu Rasik Mohan Chakma hi Mizoram Governor chuan CEM thar atan a ruat a. Kum 1999 aṭanga 2003 leh kum 2003 aṭanga 2008-ah te khan CEM lo ni tawhin, tun hi CEM-a a ṭhut ṭum thumna tur a ni. Kum 1993-a a ṭum khat nana MDC-a thlan tlin a nih hnuah 1-Borapansury-I Constituency aṭangin MDC-ah ṭum 5 thlan tlin a ni tawh bawk.

Pu Rasik Mohan Chakma hi tun term kal lai, 10th CADC-a CEM pahnihna niin, Pu Shanti Jiban Chakma a thlak a. BJP ticket-a thlan tlin Pu Shanti Jiban Chakma hi May 2018-a lak luh a nih aṭangin thla kaw chhung CEM a ni hman a ni.