Vawiin khan Serchhip District Immunization
Task Force Committee ten India rama Zenghri Um bo beihpuithlakna Ni
National Immunization Day, thla leh Ni 5
a neih dan tur chungchang sawi hovin Pu Chuauhnuna, MCS, Addl. DC, Serchhip hovin Meeting an nei.
Chairman
Pu Chuauhnuna chuan, he vaccine hi a dawng tur ten kim taka an dawn ngei theih nan khaw tina
hriselna lama thawktute leh khawtlang hotute chu thawhpuiah
sawmin, anmahni khua theuhah he zeng hri danna (IPPI Vaccine) la turten an
lak ngei theih nan thawktute lo tanpui tur leh
mipui ten lo ngai pawimawh se a duh thu a sawi a. Dr. Lalhlunpuii, Immunization Officer chuan IPPI Vaccine beihpui thlak dan
tur a ruahmanna siamsa te reportin,
sawiho ngaite an sawi ho a, Dr. Lalhlimpuii, Surveilance Medical Officer, World Health
Organisation(WHO) hnen atangin kan thenawm ram Myanmar leh Pakistan ramah
Zenghri hi a la awm thu leh heng thenawm ramte
nena kan intlawh pawh reng avang
hian zenghri (Polio) natna inkaichhawn awlsam tak hi kan ramah rawn lut
thei reng anih thu leh hun engemaw chen chu he hri danna hi inpek zui reng a
ngaih thute ngaihthlak a ni bawk.
Serchhip
District chhunga Zenghri Danna beihpui thlakah hian khawtin leh veng tina Accredited Social Health Activist (ASHA) leh hriselna lama thawktu Health Worker te chu hma la tura ruat an ni a, anni hian
February Ni 5 khian Serchhip District
Hospital-a Main Centre leh Aganwadi leh Sub-Centre Booth hrang hrangah
te hri danna beihpui thlak an nei ang a, hetih rual hian
District chhung khawtinah naupang kum 5 hnuai lam te tan Zenghri
danna (IPPI Vaccine) pek beihpui thlak hna hi kalpui a ni dawn a ni.
Vawiina Serchhip District Immunization Task Force Committee ah hian Rulhut leh a kaihhnawihin natna hrang hrang a thlen theih te laka invenna ni, February ni 8 a lo thleng tur National De-Worming Day hmandan tur leh hemi ni atana tul leh pawimawh hrang hrangte sawi ho nghal niin, Education Department leh Social Welfare Department te nena thawh ho dan tur te bakah, Ministry of Health & Family Welfare in Operational Guidelines a lo siam anga he vaccine pek hi kalpui dan turte rel a ni bawk.
