1032/2023-2024

Dated Serchhip, the 5^th July, 2023: Vawiin khan Pu C. Lalrinsanga, Agriculture Minister chuan Serchhip kiang Mat lui phai, Zawlpui zauva buh leh thlai chinna hmun NH 54 kawngpui laih zauhna leivungin a tihchhiatte a en.

Zawlpuia loneitute nena an inkawm honaah Minister chuan, ramin hmasawnna kawng a zawh zel a, kawngpui pawh kan mamawh ngawih ngawih a nih avangin kan thawh a ngai a, heng hmasawnna hnathawh lian te hian nghawng engemaw a lo nei leh thin. Tunah pawh a nghawng harsatna kan han tawk a, pawi hle mai. Mahse a dawnsawn dan tawk kan lo thiam te pawh a tul hlein ka hria, tiin hmasawnna hnathawh vanga an harsatna tawh a hriatthiampui thu a tarlang a. An tawrhna hi sawrkarin a hriatpui thu hrilhin sawrkar atanga ngaihtuah sak theih awm apiangte an ngaihtuah sak tur thu a hrilh a, leilet siam theih lohva awm chhungkaw hnih Pu Thanhnuna leilet tuikawng siamna tur hi Focus atanga cheng nuaih khat an pek tur thu leh Pu Chawngsavunga leilet pawh a theih ang anga an ngaihtuah zui tur thu a hrilh a ni. Tuikawng harsatna kumtina kan tuar thin hi Solar Water Pump hmanga kawng awlsam zawk sawrkarin a dap mek thu sawiin, Solar Pump supply hna hi a chhuak tep tawh a, Mizoram hian unit 2500 chuang nei thei turah kan inngai a, man chawi lova awlsam taka tui neih dan hi a awm thuai dawn a ni, a ti. Minister hian kan ruahtui dawn te rang taka a luan ral mai loh nana hma lak a tulzia pawh a tarlang a ni.

He hunah hian loneitute chuan, kawngpui hi a taka laih a nih hmain kan tuilak tibuai thei zawnga leivung paih lo turin kan lo ngen lawk tawh a. Mahse Serchhip leh Keitum inkarah hian spoil bank pathum pek an ni a. Keinin an spoil bank te dawl nghehna siam turin kan ngen leh a, an dawl ta si lova, hetiang hi a lo thleng ta a ni, an ti.  Tuna an harsatna hi June ni 29 a lo thleng a ni a, kawngpui laihna leivung, dawl ngheh tak loh hian lui pahnih Zawlpui lui leh Tuilut lui a khuap ding a, tui hi rei tak dawl ding leh zo si lovin June ni 29 khan a rawn chim ta a, Sabereka khuangkaih ang maia rawn chim thut kha a tamin a chim chin a sang em em mai a. Kan tuilakna te, kan hmunhmate a rawn tichhe ta a ni. A tuk atang chuan lui pahnihte hi pangai takin a luang ve leh mai a ni. Kan chhiatna hi Deputy Commissioner kaihhruaiin kawng laitu Company te nen Joint Inspection kan nei tawh nghe nghe, tiin an zauva leivungin chhiatna a thlen dan tlangpui an hrilhfiah a. Chhungkaw pahnihin kuminah an leilet an siam thei dawn lova, chhungkaw pali tui lakna pipe a chhiaa, chhungkaw pakhat rubber tiak 3500 a chhe bawk. Khawl lian hmanga leivung then tur engemawzat a awm avangin vawiin thlengin JCB hi ni kua a thawk tawh a, heng leivung paihna senso zualpui hi chu Company lam hian pek an inhuam niin an sawi.

Inkawmna hun an neih zawh hian Minister hian leivungin a tihchhiah hmunhma hrang hrang te a tlawh kual a ni.