1031/2023-2024

Aizawl, the 5th July 2023: Pu Anil Shukla, IPS chuan DGP of Mizoram Police hna a rawn zawm hnuaah vawiin khan Governor Dr Hari Babu Kambhampati  chu Raj Bhavan-ah a hmu.

Governor Dr Hari Babu Kambhampati chuan DGP thar chu Mizoramah lo lawmin Mizoram Police tana hmasawnna bung thar siam belh turin duhsakna a hlan hmasa a. Governor chuan Mizoram Police ten hna an thawk tha nia a hriat thu sawiin kawng thenkhatah erawh hmasawnna tur a la awm niin a sawi. Governor chuan DGP thar chu tawn hriat ngah tak leh Police officer hming tha a ni tih a lo hriat thu sawiin a thiamna leh theihna te chu a hnathar atan hmang tangkai chhunzawm turin a chah bawk a ni.

DGP Pu Anil Shukla chuan a ma mimal chungchang, a zirna leh a mawhphurhna lo chelh tawh chungchangte Governor a hriattir hmasa a. Hemi hnu hian Mizoram DGP a rawn zawm hnuah Mizoram Police hnathawh te leh hlawhtlinna hrang hrang te uluk takin a bihchiang tawh tih a sawi a. Hmalakna tur leh hmasawnna lai tur nia a hriat te pawh Governor hi a sawipui a ni. DGP thar chuan Mizoram chu state ralmuang ber a nih chhunzawm zel na turin Mizoram police ten theihtawp an chhuah zel dawn tih a sawi a. Dan leh thupek kenkawh kawngah pawh a hma aia nasa in tan lak an tum tih a sawi bawk a ni.

Pu Anil Shukla, IPS (1996, AGMU Cadre) hi zirna lamah pawh mi chhuanawm tak niin BE (Civil), Post Graduate  (Police Management)  leh Masters in Public Policy & Management  degree te a nei a. Mahni hnaa inpe mi leh mi thiam a nih avangin International leh National Level chawimawina tam tak a dawng tawh a ni. DGP, Mizoram Police hna a rawn zawm hma hian ADGP, Andaman & Nicobar Islands ni lai a ni.

AGMUT state hrang hrangah Senior Police Officer mawhphurhna  pawimawh tak tak a lo hlen tawh a. Heng bakah hian National Investigation Agency (NIA)  ah kum 6 chhung deputation in Inspector General hna a chelh tawh a. NIA hnuaia a thawh lai hian case liantham tak tak a chingfel tawh a - Pulwama Terror attack case on CRPF, Hurriyat leaders in Terror Funding case, explosives case near Antilia (Sachin Waze Case) leh LOC Trade case ah te hmahruaitu, hnuchhuitu leh chingfeltu a lo ni tawh a ni.