1033/2023-2024

Aizawl, 5th July, 2023 : Project Management Unit (PMU), PHED buatsaihin vawiin khan Vanapa Hall-ah Aizawl khawpui chhunga tuisem tihchangtlun dan tur "Workshop on Water Management for Aizawl City - Status, Challenges & Way Forward" neih a ni a. PHE Minister, Deputy Chief Minister ni bawk Pu Tawnluia'n khuallian niin a hmanpui a, PHE Secretary Er. C. Lalremsiama chu khualzahawm a ni. He zirhona ah hian PHED in Aizawl khawpui chhunga tui a sem viltu leh enkawltu zawng zawng an tel a ni.

Workshop hawnna inkhawmah thu sawiin Pu Tawnluia chuan mipuite rawngbawlsakna kawnga felfai leh tha lehzuala hmalak duh vanga workshop PHED in an buatsaih chu thil lawmawm leh chhinchhiahtlak tak a ni a ti a. PHED a thawkte chu mipuite nen inhnimhnai tak an nih avangin hawiher leh tawngkam thlengin fimkhur a tul tih a sawi a, department mi leh sate chu a hriat chinah thawhpui nuam leh thahnemngai tak tak vek an ni a a hriat thu a sawi bawk a ni.

Khuallian chuan Urban Water Supply Scheme hnuaiah Mizoram chhunga notified town 28 te hnianghnar takin tui pek an ni tih sawiin, an mamawhna a punzel avangin a tihchangtlunna tur scheme dang dapin ngaihtuah thin a ni a ti a. NESIDS hnuaiah hnuaiah pawh hemi atan hian scheme lian tak tak khawih mek a nih thu a sawi a ni. Khawpui liante tui pek chungchangah tui lakna hnar a that tawk tawh loh avangin harsatna an tawk thin tih sawiin, mipuiten tuihna hum halh kawngah tan kan lak nasat a tul hle tih a sawi a ni.

Pu Tawnluia chuan thingtlang khua zawng zawngin tui tlan tur thianghlim leh hrisel an neih theihnan sawrkar laipui ruahmanna in hma lak mek a ni tih a sawi a, Kum 2019 a bul tan Jal Jeevan Mission (JJM) hnuaiah thingtlang khua zawng zawnga in tinah tui connection pek kan tum a, khua a tui thianghlim lak thlen mai kha a ni lova, in tinah tui connection a free a pek tur a ni a, an inchhung ngeiah tui thianghlim an herh haw a ngai a ni, a ti a. JJM hnuaiah tui connection 133060 chuang pek tur target an  neih thu sawiin, tui connection pek tawh 118500 a ni a, la hmabak 14460 vel hi kumin December thla ral hmain pek zawh an tum tih a sawi a ni. COVID-19 vangin hna kan duh angin kan thawk chak thei lova, heti chung hian department hnuaia  thawktuten theihtawp an chhuah avangin Mizoram chu India rama State titha berte zingah kan lang hi a lawmawm a ni a ti a. State dang ten an target an zawh hun tur pawhsei an dil laiin keini chu a hun tawp hma in zo thei turin tan la rawh u, ti khawpin min fuih hi a lawmawm takzet a ni.

Khualzahawm Er. C. Lalremsiama pawhin thu sawiin Mizorama mihring cheng zinga 28% vel hi Aizawl khawpuiah kan chen avangin tui thianghlim pek kawngah pawh hma a zau bik a, theihtawp kan chhuah chungin hmasawn zel tur leh mipui hnena service tha zawk pek zel kan duh avangin vawiin hun hi kan buatsaih a ni, a ti a. Mipuite tana rawngbawl kan nih inhre thar ziah turin kalkhawmte a chah a ni. Aizawl chawm zo khawp tui an la pump thei rih lo tih sawiin, tuna SIPMIU hmalakna hi a hlawhtlin hunah chuan reiloteah Aizawl hnianghnar taka chawm thei tur tui an pump thei dawn tih a sawi bawk a ni.

Worshop hawnna inkhawm kaihruaitu leh inlawmna thu sawitu Er. Lalrothanga, CE, Zone-I chuan Mizoram thingtlang khua 89% ah tui connection pek an nih tawh thu a sawi a, zirna in (school) 80% leh Anganwadi 97% ah tui connection an pek tawh thu sawiin, Urban town 28 ah tui an hniang hnar a ti a. Aizawl khawpui bikah hian PHED hnuaah tui semtu mi 433 leh tui pumptu mi 79 an awm thu a tarlang bawk.

Workshop hawnna inkhawmah hian Pu C. Laldawngliana, Vice President, Mizoram Consumers’ Union leh Pu H. Lalhmingmawia, Co-ordinator, Synod Social Front te pawhin thu an sawi a, Er. Lalrinzuala Ralte, SE, AWC in lawmthu sawiin hun a khar a ni.

Workshop on Water Management for Aizawl City - Status, Challenges & Way Forward hi hun 4 ah then niin hun khatnaah Er. Lalrinzuala Ralte, SE, Aizawl WATSAN Circle hovin “Tuisem Chungchang” zirho a ni a. Hun hnihnaah Er. Lalhruaia, EE, Aizawl Water Distribution Division (AWDD) North hovin “Tui Connection Pek, Pipe Fit leh Repair Chungchang” zirho a ni. Hun thumnaah Er. Lalsanga, Sr. EE, Monitoring Cell, E-in-C hovin “Water Meter Reading lak leh Tui Bill Chungchang zirho a ni a. Hun linaah Er. Lalzuimawii, EE, Aizawl Water Distribution Division (AWDD) South hovin “ Tui Tihthianghlim, Thawktute leh Mipuite Inlaichinna Chungchang” an zirho a ni. Session tinah uian zawhna leh chhanna hun bakah sawihona neih a ni. Workshop neih zawhfel a nih hnu hian PHED hnuaia Junior Engineer leh a chunglam zawng he workshop a telte awm hnufualin workshop atanga thil thar bawhzui ngai leh ngaihven zui ngaite an sawiho nghal a ni.