Vawiin khan sorkar laipui Department of Agriculture & Cooperation Joint Secretary Pu E.K. Majhi leh Agriculture Minister Pu H. Liansailova te chu a office-ah an inhmu a, Mizoram lo tlawha a lo zin chhan leh thil pawimawh hrang hrang an sawi a ni.
An inkawmna-ah hian Agriculture Minister chuan Mizoram Sorkar hnuaia Agriculture Department hmalakna hrang hrang a hmun ngeia a rawn enpui leh loneitute mamawh leh harsatna hriatpui tura a lo kal theih avangin Pu Majhi chu lawmthu a hrilh a. Mizoram loneitute leh Agriculture Department-a field officer ten theihtawp chhuaha hma an lak chhoh chuan hun rei lote chhungin buh leh bal tharchhuahah nasa taka Mizoramin hma a sawn a beisei thu a hrilh a. NLUP hmanga Agriculture Sector bikah hmasawnna lang tham hmuh chhoh zel a nih thu te, tlangram loneih bansana chhungkaw tam takin lo nghet leh eizawnna ngialnghet an neih mek thu te a sawipui a. Mizoram-in Centrally Sponsored Scheme (CSS) an hman tangkaizia te, RKVY hnuaiah buh chin dan thar SRI hmanga buh tam zawk thar tura hmalak mek a nih thu leh leilet leh Terrace te siam belh mek a nih thu a hrilh bawk. Minister chuan Mizoram-ah Oil palm hlawhtling taka chin mek a nih thu leh Oil palm buaipuitu Company te nena thawhhona tha tak an neih thu te, hun rei loteah Oil palm Factory bun fel a nih tur thute a hrilh bawk. Minister chuan 12th Plan lo awm turah pawh Mizoram Sorkar chuan Agriculture Sector hnuaia hmalakna tur hrang hrang Central Sorkar-in a duan turte chu hlawhtlinpui ngei tur leh kuthnathawktute tangkaipui tur zawnga kalpui zel a nih tur thu a sawipui bawk.
Joint Secretary Pu E.K. Majhi pawhin 12th Plan chhunga Agriculture Sector hnuaia Scheme hrang hrang – RKVY, National Food Security Mission (NFSM), National Horticulture Mission (NHM), National Mission on Farm Mechanization, National Seed Mission, National Mission on Oilseed te bakah programme thar Rainfed Area Development Programme (RADP) hmangin Central Sorkarin nasa taka hma lak a tum dan te a tarlang a. Mizoram Sorkar hnuaia Agriculture Department chu India Today-in a buatsaih ‘State tenaute zinga hmasawn nasa ber (most improved small state)’ lawmman a dawng chu a lawmpui thu a sawi a. Agriculture Crop Husbandry hnuaia CSS hmanga kuthnathawktute hmalakna Sihphir, Durtlang leh Kolasib-a a mit ngeia a hmuhte chuan a rilru a khawih thu leh an hmalaknaah lungawithlak a tih thu te, Kolasib District-a Oilpalm chinna hmun leh Nursery a tlawh atangin Oilpalm chu Mizoram kuthnathawktute tan innghahna tlak eizawnna a nih ngei a rin thu te, uar lehzuala Oilpalm ching tura a beisei thu te leh Company te nena thawhhona tha tak an nei chu fakawm a ti bawk.
Joint Secretary chuan buh hi kan chaw rinpui ber a nih avangin dah pawimawh ber turin loneitute nen an inkawmnaah a sawi lang a, buh chin theihna hmunah chuan thlai dang ching lo turin a chah nghal bawk. Tin, Sihphir leh Kolasib-a loneituten an harsatna an lo thlen Agriculture Link Road chu ngaihmawhawm a tihzia leh a theih ang anga lo bawhzui a tum thu a hrilh bawk.
