Mizoram Governor Pu Vakom Purushothaman chuan vawiin khan Kolasib a tlawh a. Amah hmuahna inkhawm St. Johns Higher Secondary School Auditorium-a neihah Kolasib District chu District changkang tak nia a hriat thu a sawi a. Aizawl District pela a fehchhuah hmasak bera Kolasib a tlawh thei chu lawmawm a tih thu pawh a sawi a ni.

Governor chuan, Mizoram mipui hi ka mipui te in ni, a ti a. Harsatna an tawh leh puih an ngaihna apianga puih a tum thu a sawi a ni. Mizoram chu tunhma lamin ziak leh chhiar thiam lamah pahnihna Kerela dawt chiaha awm thin an ni a, hemi kawngah hian tan lak lehzual in ngai a ni, a ti.

Pu Vakkom Purushothaman chuan, kei chuan Politics thil sawi ka tum lova. Amaherawhchu ram mipuite tana tha tur chu ka sawiin ka ti zel dawn a. Tuna Sawrkarin mipui eizawnna dinhmun siamsak nana Flagship programme, NLUP a kalpui mek hi a hlawhtlin ngei theih nan sawrkar hnathawkte leh mipui te chu sawrkar tawiawm turin a chah a. Mizo mipui te chu a tam ber Lo neiha innghat an nih tlat avangin he flagship programme hi sum harsa tak kara tih a ni a, a hlu hle a ni, a ti a ni.

Mizorama Christian ten rawngbawlnaa ngaia rethei leh nei lo te hnena sikul dina zirtirna an pe thin chu a ngaihsan thu leh hei hi Kerela ah pawh a tangkai hle thu a sawi a ni.

DC Pi Niharika Rai chuan thuhma sawiin Kolasib District chu kawng hrang hrangah tluang taka hma sawnin chungchuanna thenkhat a neihte a tarlang a. Mizorama rel lut chhun chu Bairabi-ah anih thu te, CIJW School, Asia rama awm chhun Vairengte-a a awm thu te, rethei in sak tur thlan danah sawrkar laipui duhdan Gram Sabha a taka hmangtu District a nih thu te a sawi a. Governor chu District a rawn tlawh avanga a lawmthu te a sawi a ni.

Kolasib District chhung chanchin tawi Power point presentation hmangin Pi Lallianpuii, DIPRO-in a sawi bawk a. Governor leh amah tawiawmtute hi DC leh SP chuan thilpek an hlan a ni.

Pu Madhur Verma, SP, Kolasib chuan lawmthu sawiin inkhawm a tin a. Lam leh zai bakah Kerela lam te entir a ni.