Khawvel huap ‘International Conference on Advances in Environmental Chemistry’ chu vawiin khan Mizoram University-a Department of Chemistry-in New Administrative Conference Hall-ah a thleng a. He Conference hi ni 16-18 November, 2011 chhung awh tur niin vawiin khan UD&PA Minister Pu Zodintluanga’n a hawng a ni.

Khuallian Pu Zodintluanga chuan khawvel huapa thupui pawimawh tak ngaihtuah ho tura Mizoram University-in a vawi khatna atana a thleng leh chumi hawng thei tura chanvo pek a nih avangin a lawmthu a sawi hmasa a. Mihring te tan Science hian remchanna leh hnathawh ropui tak tak a thlen theih rual hian kan dam khawchhuah leh nunna hnar ber erawh chu kan chenna leilung a nih miau avangin leilung humhalh leh a ti chereu lo thei ang bera kan hman tangkai hi thil pawimawh hmasa nia a hriat thu a tarlang a. Conference hmang tura ramchhung leh pawn atanga mithiam lo fuankhawmte chuan mihring hualtu chhehvel thil leh sik leh sa danglam chak tak chungchangah thil tangkai pawimawh thahnem tak an sawichhuah te chu University zirlaite pawhin bengvara an hriatna tizau leh ram tana hmang tangkai tum turin a fuih a ni. Khuallian hian Conference Proceedings bu a tlangzarh nghal bawk a ni.

Vawiin Conference hawnnaah hian Institute of Chemical Technology, Mumbai-a Vice-Chancellor Prof.G.D.Yadav, Tezpur University Vice-Chancellor Prof.M.K. Choudhury, Kwandong University, Korea-a Chemistry Department Head Prof.Seung Mok Lee ten thu an sawi a. Mizoram University Vice-Chancellor Prof. R. Lalthantluanga chuan kalkhawmte lawmna thu a sawi a; Mizoram University-a Chemistry Department chuan Kwandong University nen thawhhona tur an duang mek a, hun reiloteah tih puitlin a nih a beisei thu leh a puitlin hunah chuan Mizoram University-in rampawn University nena thawhdunna an neih hmasa ber tur a ni ang, a ti.

United Nations chuan kum 2008 khan kumin 2011 hi ‘International Year of Chemistry’ atan a lo puan tawh bawhzuina pakhat atana buatsaih he International Conference on Advances in Environmental Chemistry hmang tur hian rampawn atangin Korea, China leh Singapore University bakah ramchhung University hrang hrang atangin mithiam thahnem tak an lo tel a. Hmarchhak state University - NEHU, Assam University, Guwahati University, Manipur University leh Tezpur University te pawhin palai an rawn tir a ni.