Supreme Audit Institution of the Comptroller & Auditor General of India in kum 150 a tlin (1860 - 2010), ram puma nikum 2010 November ni 16 atanga a lawmna neih mek chu vawiin khan Tourist Lodge, Chaltlangah Accountant General (AG), Mizoram buatsaihin a kharna hun hman a ni a, Chief Minister Pu Lal Thanhawla chu khuallian a ni.

Chief Minister chuan India a audit hna thawktu lu ber, Comptroller & Auditor General of India(CAG) in kum 150 alo tling hi namailo tak a ni a ti a; a kharna huna tel tura sawm a ni chu AG, Mizoram chungah leh hnathawktute chungah lawmthu a sawi a. Tunhnaia 2G scam leh Commonwealth Games a sum tih chingpen chungchanga CAG hnathawh hi tun hmaa la hriat ngai loh an ni a ti. Hun inher danglam zelah India chu khawvela sum dehchhuahnaa ram thang chak ber te zing ami ani pha hian, thil inthlakthlengna tam tak, Health ah te, Education ah te leh Rural Development lamah a rawn thlen mek a ni a ti a.Hengah te hian sum kan hmanna te a dik chiah em tih endik hna, Audit hian a thawk a, hei hian langtlang leh mawh lak ngamna a siam a ni a ti. Sorkarin sum lama inrelbawlna felfai a neih theihna kawngah Audit hi hmaih theih a nilo a ni a ti.

Chief Minister chuan state sorkar kan nih ang hian mipui sum chu sanction anihna ang chiaha hman anih ngei hi kan chiang tur a ni a ti a. Tunhma lama AG, Shillong ami ten audit tura an lokal chang te khan kan tim hle thin a ni a, tunah chuan AG puitling Aizawlah ngei kan nei ta hi a lawmawm hle a, an tawnhriatte hi tangkaipui kan tum tur a ni a ti. Sorkar tha leh dik kan neih theih nan, New Secretariat Complex a an office an luah hunah Mizoram sorkar hnathawk hrang hrangte hnenah AG hian training pe thei thin se a duhthu Chief Minister chuan a sawi a. 12th Five Year Plan kan hman mai turah, hmasawnna tam zawk mipui ten kan hmuh theih nan sorkar chu a inkau reng a ni a ti.

CAG hnuaiah hian state tinin AG an nei vek a. State sorkar sum hmante audit hna thawkin, chu chu CAG ah hian an thawn ve leh thin a ni.

CAG in kum 150 a tlin, kum khat chhung lawmna buatsaih ah hian inelna hrang hrang Quiz te, Chess leh Carrom ah neih a ni a. Chumi a lawmman dawngtu te hnenah Pi Lal Riliani chuan lawmman a sem a ni.

Kharna inkhawm hi Pu L.Tochhawng, Accountant General, Mizoram in a kaihruai a. Lawmna thu a sawi ah Pu L.Tochhawng chuan AG, Mizoram hi kum 2007 khan amah leh Dy AG nen chauh bul an tan tih a sawi.

Tunah hian AG, Mizoramah Staff Selection Commission Exama tlingte leh Mizo thalai contract basis a thawk tur lak 50 ssste tiamin hnathawktu zawng zawng 180 an awm mek a ni.

Inkhawmah hian Pu K.Lianzuala, Chairman, KVI, Pu C.Ramhluna, MLA leh Pu Lal M Dingliana, Chief Information Commissioner te an tel a ni.