No.1975/2021-2022
Aizawl 24th August 2021: Vawiin khan Agriculture Minister Pu C. Lalrinsanga pisa-ah Pangbalkawn, Kolasib District-a Mizorama a hmasa ber tur Rice Mill bun mek commission dan tur chungchangah meeting pawimawh tak neih a ni.

Mizoram sawrkarin Mizorama buh chingtute leh leilet neituten hlawk zawk leh awmze zawka he Rice Mill hmanga an buh thar te an tihral theihna turin Collective Farming system duan mek a nih thu tarlan a ni a. System thar ah chuan buh chingtute chu Farmers Producer Organisation (FPO) anga enkawl an ni ang a, an tharchhuahte chu he Rice Mill-ah hian lakkhawm a, mumal taka tihral tum a ni thu meeting-ah tarlan a ni.

Agriculture Minister chuan Mizoram-in Pangbalkawn-a Rice Mill buatsaih mek chu commission theih mai tawh tur a nih thu a sawi a. Meeting-ah hian he rice mill-a her tur kan loneitute tharchhuah buhhum lei sak dan tur te leh a hralhchhuah leh dan tur kalhmang te ngun taka sawiho a ni. Minister chuan buh thar tihpun a nih zual theih nan Agriculture Department leh Irrigation & Water Resources Department tangkawpin kum khata buh vawi 2 thar thei tura ruahmanna kalpui mek a nih thu a sawi a. Modern Rice Mill din tura Sawrkar hmasa lama hmalakna bul lo in tan tawh chu changtlung zawka a hmawr bawk pui ngei a nih theih nan tun sawrkar hian theihtawp a chhuah mek a ni a ti.

He Rice Mill hian darkar 1-ah buhhum metric ton 5 a her thei a, a hmunhma leh building te erawh darkar khat a metric ton 10 her thei tura ruahman a ni a. Kum khat chhungin buhfai quintal nuai hnih chuang her chhuak thei tura beisei a ni.

Meeting-ah hian Agriculture Department Secretary Pu J.Hmingthanmawia, IAS, Pu Rohmingthanga Colney, Director of Agriculture, Pi Ramdinliani Director, FCS & CA, Finance Department aiawh leh Agriculture Development Board member te an tel a ni