No.1976/2021-2022

Aizawl the 24th August, 2021 : New Delhi-a cham mek Tourism Minister Pu Robert Romawia Royte chuan Union Tourism Minister of State Pu Ajay Bhatt chu a chenna inah nizan khan a kawm a, Mizoram Tourism Department hmalakna tlangpuite a hrilh.

Tourism Ministry-a Project sanction tura thehluh tawh te rang taka sanction tura Pu Robert Romawia Royte-in a ngenna chu Union Minister Ajhay Bhatt chuan ngai pawimawihin tihfel thuai a tum tur thu a lo hrilh a. Mizoram Tourism Minister sawmna angin Mizorama lo zin vat a tum thu a sawi bawk a ni.

Pu Robert Romawia Royte chuan Union Defence Minister of State ni bawk Pu Ajay Bhatt hnenah hian Myanmar leh India inkarah inkungkaihna tha zawk a awm zel theih nan Myanmar ramah Astroturf Football Field te, Indoor Stadium te, school building te, Community Hall te leh Futsal ground te India Sorkar suma siam a tul hle tih a hrilh a. Defence Minister chuan Mizoram Chief Minister-in Prime Minister hnenah ziaka thehlut tura thurawn lo pein, bawhzuipui a inhuam thu a sawi a ni.

Vawiin 24/8/2021 hian Tourism leh Sports changtu Minister Pu Robert Romawia Royte chuan Niti Ayog Adviser Dr Prem Singh, IAS pawh kawmin Tourism leh Sports tihhmasawn nana EAP Project sanction tur buatsaih lai mekte a sawipui bawk a. Ngun taka an sawiho hnuah Niti Ayog Adviser chuan an chanpual chu ni reilote chhunga an tih fel tur thu a lo hrilh a, Finance Ministry ah recommendation an lo thawn nghal dawn a ni.

Minister Pu Robert Romawia Royte hian Ministry of Minority Affairs leh Ministry of Finance a Officer liante a kawm bakah IT Minister a kawm bawk a ni.

Sports leh Tourism changtu Minister Pu Robert Romawia Royte hi Mizoram House OSD Pu Ajay Choudhuri, Tourism Director Pu V.Lalengmawia leh officer dang ten an tawiawm a ni.