No.1974/2021-2022
Aizawl 24th August, 2021 : Vawiin khan Health Minister Dr R.Lalthangliana,South Tuipui Bialtu MLA ni bawk chuan Border Road Organization (BRO), Ministry of Defense, Govt of India – in a bial chhung Tuipui-D (Darzo kai) Lei dawh thar tura ruahmanna an siam mek chu chak zawka bawhzui a nih theih nan a hmunah a tlawh. Minister hi 71CC BRO Project Pushpak Engineer BK Mishra chuan a lo dawng sawng a, Minister hi Aizawl atangin BRO Project Pushpak Chief Engineer PN Yadav chuan a tawiawm a ni.

Tuipui D (Darzo kai) Lei hi Border Road Organization, Ministry of Defense (Govt of India) bul tumin Motor eng chi pawh zawh thei tura siam tura ruahman a ni a. He Project atan hian DPR pawh thehluh tawh a nih thu BRO Engineer-te hian sawiin he ruahmanna hi tum anga kalpui theih a nih chuan Cheng vaibelchhe 80 vel sengin Kum 2 chhunga dawh zawh fel theih an in beisei thu BRO hotute hian Minister hi an hrilh a ni. Minister pawhin Tuipui-D (Darzo) kai Lei hman mek chu chhim lam khaw tam takte mamawh chawk luhna kawng pawimawh ber pakhat a ni tih sawiin Lei (Bridge) changtlung zawk dawh tura ruahmanna awm mek chu a puitlin ngei theih nan leh chak zawka hmalakna kalpui a nih theih nan Ministry of Defense lamah bawhzui turin karlehah Delhi zin thlak a tum thu a sawi a ni.

Minister Dr R.Lalthangliana hian Tuipui-D ,Hnahthial Electric Veng leh Hnahthial Kanaan Veng 4C ten a tul anga an hman turin VLTF te kutah Rs 10000/-(Singkhat) theuh a hlan a, Hnahthial District Hospital a hman turin Rs 10000/- (Singkhat) a pe bawk. Health Minister hian Pangzawl PHC sak mek chu a hmunah a tlawh nghal bawk a ni.

Minister Dr Thangtea hi Hnahthial DC, SP leh PWD hotute bakah mi pawimawh dang ten an tawiawm a ni.

Minister hian Vawiin vek chawhnu dar 3 khan Serchhip DC Conference Hall-ah District Level Task Force on COVID-19 hmalak mekna leh hmachhawpte thlirhona hun Serchhip District thuneitute a neihpui nghal bawk a ni.