No.1973/2021-2022
Aizawl Thlazing ni 24, 2021: Vawiin khan Lawngtlai District Transport Office building thar Rs nuai 228 senga sak chu Transport Minister Pu TJ Lalnuntluanga'n a hawng.

Transport Minister chuan Lawngtlai District-ah Transport Office building thar tha tak mai hawn a ni thei ta chu lawmawm a tih thu a sawi a. Transport Department-a thawktute chuan hna an thawk rim tak zet tih sawiin, thawktu indaih lo viau chung pawhin, thawktu zawng zawngin theih tawp an chhuah thin chu lawmawm a tih thu a sawi a. Eng hna pawh tih tak taka thawkte chuan hlawhtlinna an chang thin tih sawiin, thawktute chu thahnem ngai taka an hna thawh tha chhunzawm zel tura fuihin, Lawngtlai District mipuite pawh Transport Department nen thawh hona tha tak an neih chu vawng nung zel turin a chah bawk.

Lawngtlai DTO office hawnnaa khual zahawm, Lawngtlai East bialtu MLA, Agriculture Development Board Vice Chairman Pu H. Biakzaua chuan sawrkarin Lawngtlai District chu a theih ang angin a thuam chho mek tih sawiin, sawrkar hma laknaah lawm thu a sawi a. Transport Department kaihhnawiha Lawngtlai District mamawhte chu Transport Minister bulah thlenin, Lawngtlai leh Sangau inkar bakah, Lawngtlai leh Zochachhuah inkarah te State Transport Bus service-tir tur te, Thlengang leh Vartekkai inkar Chhimtuipuiah Marboat dah tur te leh Lawngtlai DTO office-a thawktu indaih lohna su kiang tur tea hma la turin Transport Minister chu a ngen a ni.

Transport Department Director Er R. Lalrammawia kaihhruai, Lawngtlaia DTO office hawnnaah hian Lai Autonomous District Council (LADC)-a Chief Executive Member Pu Manghmung Chinzah pawhin thu a sawi a. LIKBK Assembly-a Associate General Secretary Rev. Dr LH Lalpekhlua'n hunserh hmangin, Additional DC Pi Marilyn Rualzakhumthangi'n inlawmna thu a sawi a. PWD Building Project Division, Lungleia Executive Engineer Er R. Zirsangliana chuan technical report pein, District Transport Officer Pi B. Malsawmtluangi'n lawm thu sawiin hun a khar a ni.

He hunah hian Mamit bialtu MLA, Road & Infrastructure Development Board Vice Chairman Er H. Lalzirliana bakah, Transport Department hotute, LADC-a member-te, Lawngtlaia state sawrkar department hotute leh sawm bik mi pawimawhte an tel a ni.

DTO office Lawngtlai hi NEDP sum hmangin Rs nuai 228 sengin June ni 20, 2016 khan sak tan niin, nikum 2020 January ni 31 khan sak zawh a ni a. COVID-19 hri leng avanga a hawn hun sawn chhoh zel a nih hnuah vawiin khan hawn theih a ni ta a ni.

DTO office Lawngtlai hi Mizopa chhiara chhawng thum niin, square metre 658.81-a zau a ni.