No.1972/2021-2022
Aizawl, the 24th August, 2021: Vawiin chawhma dar 11:00 khan Khawzawl District Bawrhsap Pu C.C. Lalchhuangkima, District Election Officer ni bawk chuan Systematic Voters Education and Electoral Participation (SVEEP) kaltlangin Khawzawl Town chhunga Booth Level Officer (BLO) te hnenah Bookmark, Election chungchang inzirtirna thu chuang a sem chhuak.

SVEEP Bookmark sem puala vawiina DC Office Conference Hall-a programme tawi neihah Khawzawl District Election Officer Pu C.C. Lalchhuangkima chuan thu sawiin, BLO te chuan India rama Election kalphungah mawhphurhna sang tak leh pawimawh tak an nei a ni, a ti a. Inthlanna felfai leh thianghlim nei tur chuan mipuiin Election kalphung an hriat mai bakah vote thlak leh Electoral Roll-a inthun pawimawh ziate, an vote hlut ziate an hriat a ngai a ni tiin, mipui hnena Election kaihhnawih thil pawimawh hrilhhriat kawngah BLO te chu tan la sauh sauh turin a chah a ni.

He hunah hian Pu H. Lalramenga, Election Officer pawhin thu sawiin, Covid-19 hrileng vanga mipui inkohkhawm tam a rem loh avangin mipui tam zawk thleng thei tur ngaihtuah chungin Bookmark chu sem a ni, a ti a. Electoral Roll-a inziahluh leh vote thlak pawimawhna thu chuang Bookmark-te chu Tuichang Assembly Constituency-a chhungkuate thleng theuh tura beisei a nih thu a tarlang bawk.

Khawzawl District Election Office hian Tuichang Assembly Constituency enkawlin, kumin January ni 20 a Final Roll tlangzarhah khan voter 16,971 an awm a ni. Bookmark hi 6,000 semchhuah tur niin, Khawzawl Town bikah chuan 2,250 semchhuah phawt a ni.

Vawiina SVEEP Bookmark semnaah hian Pu James Lalnithanga, SDO(Sadar) & Electoral Registration Officer, Election Branch-a staff te, MJA aiawh leh Khawzawl Town chhunga BLO 11 (sawmpakhat) zinga 10 (sawm) te an tel a ni.