3185/2022-2023
Lunglei 6th January 2023 : Vawiin khan Agriculture Minister Pu C. Lalrinsanga hovin Electric Mual Buarpuiah "Into delh" tih thupuia hmangin Buarpui khawtlangin haw runpui an hmang.
Buarpui khaw haw runpui lawmna inkhawm hi Pu R. Lalruala, Chairman, Organising Committee chuan kaihruaiin Minister Pu C. Lalrinsanga chuan Buarpui mipui te haw runpui a tel zawng zawng chungah lawmthu sawina leh chibai bukna neiin vawiin a kan thupui 'In to delh' tih anih ang takin Buarpui mipui te chu mahni ke a ding thei tur chuan kan nitin khawsakah leh ei leh bar kan zawnna kawng bakah tun ai in thalai te pawh zirna lamah taimak chhuah leh zual a tul a ni, a ti a.
Kan ram kan intodelhna tur atan chuan Agriculture leh Horticulture lama tan kan lak nasat a tul hle a ni tiin, kuthnathawktute dinhmun ti hmasawn turin sawrkarin theihtawp a chhuah mek zel a ni, a ti a. Buarpui khaw daia Tlawng Lui bul Chawmphai link road 7km lai laih tura ruahmanna siam mek a nih thu sawiin he link road hi kuthnathawtute hmasawnna atana pawimawh tak ala nih chhoh zel a beisei thu a sawi a ni. Zirna ti hmasawn tur pawhin hmalak mek zel niin sawrkar laipui PMJVK Scheme hmangin Bungtlang atanga Vanhne thleng School sak that ngai te sa tha tura ruahmanna siam mek anih thu a sawi bawk. Buarpui a Eklavya School din tura ruahmanna awm pawh la kalpui chhun zawm mek zel niin zirna leh ei leh bar zawnna kawngah nasa taka taimak chhuah zel turin Buarpui mipui te chu kan rilru te kan siam fel tur a ni a ti.
Vawiin Buarpui khaw haw runpui ah hian Buarpui atanga huaisen lawmman dawng National Awardee te Pi Zadingi leh Tv Ramngaihsanga (L) te hnenah chawimawina thuziak hlan niin kum 2022 chhunga buh thar tam te hnenah lawmman thuziak leh pawisa fai hlan an ni bawk.
Kum 2022 chhunga Buarpuia buh thar hnem te
1. Lalchhandama
2. Laltawna
3. Lalmawia leh Lalthianghlima Hnamte te an ni.
Vawiin a Buarpui khaw haw runpui ah hian Prof. RK. Ngurtinkhuma, Aizawl leh Dr. S.R. Ngurchamliana. Medical Superintendent, Lunglei ten thusawina hun an nei bawk a ni . Tlai lamah khawtlang huapin chawhlui kil ho na neih nghal a ni.
