3184/2022-2023
Dated Serchhip, the 6th January, 2023: Vawiin khan Pu R. Lalzirliana, Minister, P&E, Art & Culture, LRS & WC, DC & MA, etc., chuan Tuichangral Zirlai Pawl (TCZP) General Assembly vawi sawmna, Bawktlang Community Hall a neih chu khuallian niin a hmanpui.

He hunah hian khuallian chuan, zirlai naupangte chu duhsakna chibai bukin tun hi an vanglai hun tha, hlim taka an chen tur a ni tih hriaa Pathian hrerenga an vanglaite chen turin a hrilh a. An inkhawmpuia khualliana an sawm avangin lawmthu a sawi a ni. Tun hnai maiah hripui avangin hun rei tak kan inkharkhipa, ramri buai avangin hun harsate pawh kan tawk bawk a. Hmanlai ata vawiin thlengin unau indawm tawna, mi harsate inngaihtuah tawn dial dial thin kan nihzia a rawn lang leh nasa hle a nih kha. Hetiang hian kan hnam hi inngaihsak tawn thin lo ila chu mi tam tak tan mualpho leh meialh en ngawt mai te pawh hmabak palh theih a ni awm e. Inhmangaihtawnna rilru pua 'Sem sem dam dam, ei bil thi thi' tih thupuia vawiin thlenga in chawi nung zel hi ka lawm hle a ni, tiin TCZP ten Motto-a Sem sem dam dam, ei bil thi thi tih an hmang chu a fak a. Tunlai khawvelah thiamna tangkai leh hmantlak neih a pawimawh hle a, sawrkar hnain min daih vek loh avangin eizawnna kawng dang atana thiamna leh theihna kan dap deuh deuh a tul hle a ni. Vawiina harsa taka in beiha, in thawh fat fatna hian in hma lamah rah duhawm tak a chhuah dawn tih hriain, a lo hrehawmin a lo harsa deuh anih pawhin in zirnate in bei sauh sauh dawn nia tiin zirlaite hi a fuih a. Tin, Pu R. Lalzirliana hian ama nunkawng zawh tawhte atanga Pathian thuawih leh nu leh pa thuawih pawimawhzia leh Pathianin mal a sawm nasatzia thu ngaihnawm takin naupangte hi a hrilh bawk. Minister hian Tuichangral Zirlai Pawlte hi Portable Ampli - Speaker a pe a, Bawktlang Branch YMA te Mizo Hnam incheina set khat a pe bawk.

H. Lalrohlupuia, General Secretary chuan report pein, zirlai tithate an chawimawi thin thute, an huam chhunga zirna in hrang hrangten hma an sawn theih nana hma an lak thin thute leh sawrkain hmasawnna hna a thawh hrang hrang an theih ang tawka an ngaihven reng thin thute a tarlang a, an pawl huam chhungah hian Tuichangral khaw sawmpali (14) an awm a ni.

Tuichangral Zirlai Pawl General Assembly vawi 10 na hi nizan atanga tan niin zanin thlenga neih tur a ni a. Vawiin chawhma vantlang inkhawm bik hi Laltluangkima, Asst. General Secretary in a kaihruai a, Rev K. Vanlalhriata'n hunserh hmangin, YMA, MSU leh MZP aiawhten thusawina hun an hman bakah an Assembly inkara an member boral mi parukte sunna hun an hmang a. Tun hnaia National Award pathum lai dawngtu Leng khaw hnenah chawimawina an hlan bawk a ni. Tuichangral Zirlai Pawl hi kum 2003 a din tan a ni a, kumin an General Assembly thupui atan 'Zirlaite leh Nationalism' tih an hmang a ni.