Vawiin khan Agriculture etc changtu Minister leh bialtu MLA ni bawk Pu C. Lalrinsanga chuan Bethel Centre, Chhumliamkawn, Lunglei Female Ward a hawng.

Hawnna inkhawm Pu K. Laltawnga, Superintendent, Bethel Centre kaihhruaiah Minister Pu C. Lalrinsanga chuan thu sawiin naupang nu leh pa neilo fahrahte leh chanhaite hmangaih taka enkawl thin tu Bethel Centre-in hmasawnna duhawm tak nei zela Female Ward changtlung tak buatsaih a ni chu thinlung taka a lawmpui takzet thu a sawi a. Hnuchham, fahrah leh riangvaite enkawl hna chu thil ropui tak - khawtlang, mahni mihringpuite leh Pathian rawngbawlna a ni tiin thil phal taka Bethel Centre hnena thil pek pe thin tu mipuite hnenah lawmthu sawiin pek chhunzawm zel turin a ngen bawk. Bethel Centre - a naupang awmte chu mahni inrin tawkna rilru pu chunga taima taka lehkha zir tur leh hmathlir thui tak nei turin a chah a. Rilru beidawnna leh lung ngaihna an neih changa Pathian hnena thlen thin tur len anmahni hmangaih em em tu mi tam tak an nei a ni tih hre nawn fo turin a chah bawk.

He female ward building hi a dung ft 48, a vang ft 24 niin chhawng hnih a sak a ni. Bethel Centre hi Dt. 12/02/2003 a din a ni a, Home din  tirh lai hian ruihhlo ngai ho bik enkawl thin an ni a,he mi hnu lamah hian naupang, nu leh pa enkawltu nei mumal lo, hlamchhiah, retheih vang leh fahrah te loh theih lova enkawl an ngaih avangin Home-ah hian lakluh tel an nih thu tarlan a ni a. Kum 2013 tawp lamah  ah The Juvenile Justice (Care and Protection of Children) Mizoram State Child Protection Society Gov’t of Mizoram in a sponsored hnuah hian naupang leh puitling enkawl kawp a rem tak loh a vangin naupang chauh hi enkawl an lo ni ta a ni. ICPS-in a enkawl  atang hian thawktu  pek belh an ni a,Home-a thawktu (lo thawk sa) te pawh anmahni hnuai-ah hian hlawh neiin  rawih an ni zui ve bawk a ni.

Bethel center-ah hian puantah khawl pakhat an nei a, zirlai pahnih an awm mek a, Tun dinhmunah naupang CWC-in a dah kum 1-18 inkar 85 mipa 44 leh hmeichhia 41 te enkawl mek an ni a,Home din tirh CWC awm hma a tanga naupang an lo enkawl tawh  zawng zawng hi Mipa 538, Hmeichhia 243,an zavai in 781 an ni. An naupang enkawl tawh atang te hian hlawhtling tak tak leh an chanchin ngaihnawm tak tak sawi tur an awm ve nual tih tarlan a ni bawk.