Guwahati-a cham mek Higher & Technical Education  Minister Dr.R.Lalthangliana chuan nimina ‘Indo-Bangladesh Stakeholders Meet’ a hmanpui zawhah nimin tlai vek leh vawiin khan Guwahati-a hmun leh mi pawimawhte tlawhin an hotute nen an inkawm a. H&TE Minister Dr.R.Lalthangliana hian Assam Finance leh Health & Family Welfare Minister ni bawk Dr.Himanta Biswas pawh hmuin Mizoram sorkar nena thawhho theihna kawng hrang hrang an sawidun a ni.

H&TE Minister Dr.R.Lalthangliana-in Guwahati-a hmun/zirna in pawimawh a tlawhte chu - Indian Institute of Technology (IIT), Guwahati, Assam Vety. Science College leh Guwahati Medical College te a ni a. Ramchhungah pawh zirna in tha berte zinga tel pha Indian Institute of Technology (IIT), Guwahati hotute nen an inkawmnaah Minister chuan Mizoramah IIT a awm ve loh avangin IIT Guwahati te nena thawhho a duh thu a sawi a; IIT hotute chuan Mizoram-ah IIT Extension din theih dan tur kawng Minister hi an lo hrilh a ni. Minister Dr.R.Lalthangliana’n a sawmna angin IIT Guwahati chuan Mizoramah an mithiamte rawn tirin training course hrang hrang rawn tihpui an hreh loh thu an lo hrilh bawk a, a bik takin entrepreneurship lamah training pe thei tur mithiam tak tak an neih thu an hrilh chu Minister-in sorkar programme pawimawh tak SEDP hnuaia hmalakna atan entrepreneurship training pawh a tangkai hle dawn a ni tiin a hrilh a; Mizoram rawn tlawh thuai turin a sawm nghal bawk a ni.

Nimin tlai khan Dr.R.Lalthangliana chuan Assam Vety. Science College hmun tlawhin an Principal, Dean leh hotu dangte nen inkawmna hun tha tak an hmang bawk a. Mizoram Vety te nena thawhhona tha nei chho zel dan turte sawiin Selesih-a Vety. College te nena Student Exchange Programme neih theih nan hmalak nise tih an rel a. Dr.R.Lalthangliana chuan Assam Vety College hotute hnenah Mizoram AH&Vety Minister pawh lo kawm turin a hrilh bawk.

Vawiin chawhnu khan Dr.R.Lalthangliana chuan Guwahati Medical College tlawhin Pro Vice-Chancellor Dr.Dipika Deka leh an hotu dangte nen an inkawm a. India hmarchhakah medical college hlun leh changtlung ber an nih angin Mizoram-ah medical college din thar hmasawn zelna turah pawh anni nena thawhho a pawimawh hle dawn a ni tiin Dr.R.Lalthangliana chuan a hrilh a. GMC Pro-VC chuan Zoram Medical College-a junior doctor-te chu oncology (cancer), cardiology leh neurology lamah training pek a remtih thu Minister a hrilh nghal a ni.

H&TE Minister Dr.R.Lalthangliana chuan vawiin chawhma khan Assam Finance leh H&FW Minister ni bawk Dr.Himanta Biswas chu a pisaah tlawhin hmarchhak state 8-ah hriselna lam inenkawlna tur Hospital, CHC, PHC te chu duhthu a la sam lo hle a, helamah hian tanlak ho a pawimawh a tih thu a sawipui a. Dr.R.Lalthangliana chuan Union Health Minister Dr. Harsh Vardhan leh Assam CM Pu Sarbananda Sonowal pawh a lo sawipui tawh angin November ni 13-16, 2019 inkarah Guwahati-ah North East State 8 Health Ministers Meeting koh a rawt chu Assam Health Minister chuan a lo pawmpui a. He meeting-ah hian hmarchhak bialah medical infrastructure tihchangtlun te, medical doctor leh staff indaih lohna phuhruk dan tur te, hospital facilities tihthat leh thil pawimawh dangte sawiho an rawt a ni.