Vawiin khan Agriculture Minister Pu C. Lalrinsanga chuan Krishi Vigyan Kendra, Central Agricultural University (CAU), Selesih in Aizawl District huam chhunga loneitute tan an thawhchhuah a let a tih pun chungchanga inhrilhhriatna leh inzirtirna leh hemi atana tul, hmanrua leh thlai chi tha semna ‘Awareness for Doubling Farmers’ Income & Input Distribution Programme’ tih, KVK Selesih an buatsaih chu khuallian niin a hmanpui. He hunah hian Muthi, Durtlang, Sihphir leh Selesih a loneitute hnenah Litchi tha chi (Muzaffarpur variety), tomato leh zikhlum chi tha leh lei lehna leh hmanraw dang, KVK in a pek te chu a hlan bawk a ni.

Agriculture Minister Pu C. Lalrinsanga chuan Prime Minister in 2016 a ngaihtuah chhuah, kum 2022 a, loneitute tharchhuah a let a tihpun ‘Doubling of Farmers’ Income – 2022’ chu scheme tha tak, loneitute hmakhua ngaihtuah chunga duan nia a  hriat thu sawiin hemi tihhlawhtlin kawnga loneituten KVK te thiamna chhawr tangkai thiam a tul a, chumi rualin KVK mithiamte pawhin loneitute kawng hrang hranga an zirtir leh an kaihhruai a pawimawh tel bawk a ni, a ti a. Phai atanga thlai lo lut Mizoramin a tharchhuah ve theih ngei thlai leh thil dangte a intodelh chu a rilruah a lian hle tih sawiin kan choka a min chenchilh thin – buhfai, tel, dal, alu, purun leh aieng te hi an mikhual rei tawh a, hengte hi keimahni ngeiin tharchhuah tama, intodelh a tul a, chumi atan chuan theihtawpa kan thawh leh tan ho a ngai a, a bultan nan arhar dal chin tan a ni tawh a, tel siam nan chhawhchhi chu khat chhipui chin pun tan mek a ni, a ti. Heng hmalakna atan Agriculture Department chu thuam mam mek niin Department chuan hmasawnna rahbi thar a rap chho mek niin a sawi bawk.

Agriculture Minister chuan Mizoramin tualto thlai a neih ang ‘indigenous variety’ te chu midang min chuh loh nan dan ang thlapa a neitu nihna neih ‘patenting’ a pawimawh tih sawiin hemi kawngah pawh Department in hma a lak mek thu a sawi lang bawk. He training chhimtu Sihphir, Durtlang, Muthi, Nausel leh Selesih kuthnathawktute chu Aizawl khawpui chawhmeh leh thlai supply tu an nih angin, damdawi hlauhawm te, hlo tha lo te, an thlaiah hmang lo turin a chah a, nangmahni pawhin in ei ngam loh tur chu zuar suh u, tiin a hrilh a. Pathian rawn leh tih chunga hna thawk tura kut hnathawktute fuihin ram dinchhuahna bulthum chu Pathian ani tih hre reng turin a chah bawk a ni.

Tun hnaia vaimim leh thlai dang tichhetu Fall Army Worm in Mizoram leh loneitute a tihbuai thu sawi langin Minister chuan a tirah amah ngei pawhin he thil hi a huphurh hle tih sawiin Pathian thil tihtheihna leh mithiamte thawhpuina zarah tha takin kan hmachhawn thei a, an mi thawhpuinaah lawmthu ka sawi a ni, a ti.

Inlawmna thusawitu Dr. K.P. Chaudhary, Head, KVK Selesih chuan an Kendra in loneitute an thawhpui leh an kaihruai dan hrang hrang sawiin loneitute tharchhuah a let a tihpun dan kawng hrang hrangte a tarlang. College of Horticulture, Incharge Dean, Prof. Dr. H. Prasad pawhin thu sawiin Horticulture College dinhmun chuan hmasawnna lam a pan zel tih a sawi a. Dean incharge, College of Veterinary Science & Animal Husbandry, CAU, Selesih Prof. Dr. Fazl Ali Ahmed chuan Zo bawng leh Zo vawk mang mai thei humhalhna kawngah research an beih mek dante a sawi a ni.

Vawiin programme ah hian Durtlang, Muthi, Selesih, Sihphir leh Nausel atangin kuthnathawktu 100 vel an tel a. Litchi tiak (Muzaffarpur variety), Tomato leh Zikhlum chi tha, hmanrua – Naveen Dibbler, Twin Hole, Peg-type Dryland weeder, Cono Weeder leh sickle te loneitute pek an ni.

Tunhnaia KVK Selesih hmalakna kaltlangin Durtlang leh a khaw chhehvel danga NABARD tanpuina in tui dahkhawlna 115 siam a ni a, thlai chi tha IARI, New Delhi leh IIHR, Bangalore ami te chahchhuakin an sem thin a. Heng bakah hian khuai khawitute mi 100 hnenah training leh hmanrua te an pe a. Sihphir leh khaw dangah te hlawhtling takin broccoli chin zirtirin broccoli thahnem tak tharchhuah a ni.