Vawiin khan Agriculture Minister Pu C. Lalrinsanga'n ‘Organic Food India Conclave - 2019’chu khuallian niin Novotel, Juhu, Mumbai-ah a hmanpui a, he Conclave hi Maharashtra Agriculture Minister Pu Sadabhau Khot pawhin a hmanpuiin thu a sawi a ni.

Agriculture Minister Pu C. Lalrinsanga chuan thusawiin kum 2020 ah Organic agriculture market hlutna hian US Dollar maktaduai 200 a khum tawh tura ngaih a nih thu a sawi a. India ram hian khawvela Agriculture lam hawi exporter lian zinga pasarihna dinhmun a hauhmek a, India ramah hectare maktaduai 150 chuang thlai chin theihna hmun neiin Northeast India hian ram hectare maktaduai 5.5 laia zau thlai leh thil dang chin theihna a nei bawk a. Northeast India hi organic agriculture beihpui thlaknaa tana hmun duhawm ber a nia ti.

Pu C. Lalrinsanga  chuan Prime Minister Pu Narendra Modi'n North East India hi organic movement kalpui nan tha a tih thusawiin a lo sawi thin chu sawichhawngin sawrkar laipui ruahmanna hnuaiah Mission Organic Value Chain Development in North Eastern Region (MOVCD) chu kalpui mek a ni a,a ti a. Mizoramah pawh MOVCD hnuaiah hian Thingpui, Mizo Hmarcha, Aieng lehSawhthing ah te beihpui thlakmek a ni a. A hlawhtlinna pawh kan tel chho zel a ni a ti. Agriculture Minister chuan Mizo Hmarcha phei chu tunah hian Geographical Indication tih fel tawh a nih thu leh he hmarcha hi dan ang thlapa Mizo te ta a nih thu a sawi bawk. Mizo Hmarcha bik phei hi chu market ah pawh a hlutna a san thu leh organic movement hnuaia nasa taka thar tam tum a nih thu a sawi a. Hmarcha hmanga cheng tam tak leichhuah theihna potential Mizoramin a neih thu a sawi a. Kal khawmte ngaihven a hlawh hle a ni.

Organic farming chu Mizote tan chuan thilthar te hual a nih loh thusawiin, Mizo thawnthu pakhat Liandova te unau thawnthu ah ngei pawh Liandova te unau chu organic farming hmanga an khaw mi hausa zawng zawng ai pawha buh leh bal an thar tam zawk thu ngaihnawm takin a sawi Pu C. Larinsanga hian a sawi.

Mizoram chuan organic technology ah te, value chain marketing leh market linkage ah te hma lakna a a neih tul tih sawiin  Heng kawng ah te hian Organic movement-a khawvel hmun hrang hranga enterpreneurs-te chu Mizoram sawrkar chuan thawhpui a chak thu leh hmalak pui tura a inhuam thu a sawi sawi bawk a. Minister chuan kalkhawmte hmaah Mizoram Chief Minister Pu Zoramthanga pawhin Organic movement chu a tuipui zialeh hemi lama nasa taka hmalak a duh thu a sawi bawk.

Organic  Food India Conclave- 2019 ah hian national leh international level-a service provider te, buyer leh exporter leh mithiam rual ten organic chungchanga thiamna sang zawk inhlanchhawn na chungchang leh organic market lama insumdawn tawnna leh a kaihhnawih thil hrang hrang sawi hoin an inhmukhawm a ni.