Nimin khan Agriculture Minister Pu C. Lalrinsanga chuan organic tharchhuah lamah hma latu Reiek leh a chehvel khua te in zawmkhawm a, an din Reitlang Organic Producers’ Company Limited (ROPCO Ltd.) Annual General Meeting  hmasa ber chu Reiek Community Hall ah a hmanpui a. He meeting ah hian Pu Lalrintluanga Sailo, Government Deputy Chief Whip leh bialtu MLA ni bawk pawh a tel a ni.

Pu C. Lalrinsanga chuan Reitlang Organic Producers’ Company Limited chu Mizorama Farmer Producer Organization(FPO) 14 atanga Farmer Producer Company (FPC) a inlet thei hmasa ber ani thei chu kuthnathawktu te tan rahbi thar a ni tiin he hlawhtlinna hi Mizoram kuthnathawktute, abik takin organic farming buaipui tute tan mellung pawimawh tak anih thu a sawi. Organic farming a sawi zel naah Minister chuan tunhnaia ram chhung – Mumbai leh ram pawn – Germany leh Switzerland ah te, Agriculture Department hotute nen an zinkual naah ram changkang ten organic farming leh organic tharchhuah an ngaihhlut leh an ngaihsan zia a hmuh dante a sawi a, Mizorama pawh organic farming tih tak zeta kan buapui a, tharchhuah ram pawna hralh tur kan nei tam chuan Mizoram economy hi nasa takin a thangin a that phah thei dawn a ni, a ti a. Organic farming kawng chu kawng thui tak thil tam tak paltlang ngai tiin rinawmna leh dik taka thil tih a ngaih avangin tih ve mai mai rilru put a buaipui chi a nih lo thu te pawh a sawi tel bawk a ni.

Agriculture Minister chuan phai lam atanga Mizorama chawhhmeh lo lut te chu damdawi leh chemical a tih tiak leh enkawl anih avangin a hrisel lova, heng te hian natna hrang hrang,  tha natna, kal natna leh adangte hi a thlen em tih chu ngaihtuah tham a ni, a ti a. Sawrkar chuan ei leh bara intodelh nan kawng hrang hranga hma lak dante sawiin agriculture lamah pawh thalai ten entrepreneurship hmangin ke an pen a ngai dawn a, Sawrkar pawhin tan kan lakpui dawn a ni, a ti. Buh leh bal chinna kawnga ram hman dan leh enkawl 'land management' chu a vei hle tih sawiin Sawrkarin chemical fertiliser aiin bio fertiliser, lei hanna ti chhe thei lo hi hman tan a duh a , hemi atan bio fertiliser laboratory unit leh a kaihhnawih te din vat a ni dawn tih a sawi bawk.  

Thusawitu dang, Government Deputy Chief Whip leh bialtu MLA ni bawk Pu Lalrintluanga Sailo chuan MIP hunlaia Reiek leh khaw chhehvela aieng bul tanna chuan tunah organic lam kawng zawh a company te hial din a hma lakna awm chu lawmawm a tih thu a sawi a. Organic tharchhauh reng reng chu a hralhna man a to a mahse tharchhuaha rinawm a ngai dawn a, chemical zunzam ang chi engmah a awm tur a ni lo a, chuvangin a chingtu te hi in fimkhur hle a tul dawn a ni, a ti a. ROPCO shareholder te chu sum tam tak aiin hmingthatna thlang turin a fuih a ni.

Pu C. Lalrinsanga leh Pu Lalrintluanga Sailo te hian ROPCO ina aieng pack thar leh aieng capsule an siamchhuah thar te an tlangzarh a ni.

Agriculture Department (Research & Extension) Director Dr. H. Saitluanga, Mission Director, Mission Organic Mizoram pawhin thusawiin organic farming Mizorama bul tan anih dante leh organic farming atan thil ngaihpawimawh hriat tur te tarlangin hun a hmang a. ROPCO Ltd. CEO Pu H. Lalchhanhima hnen atangin ROPCO Ltd bul tan anih dan report ngaihthlak a ni.

ROPCO Ltd hi kum thum 3 kalta khan Farmer Producer Organization anga bul tan ani a, aieng ah bul tanna neiin hei hi organic certification nei turin an buaipui a. Reiek, Khawrihnim, Chungtlang leh Ailawng khua a aieng chingtu chhungkaw 633 an inziaklut a. Kumin July khan Registrar of Companies hnuaia registration nei felin Company nihna pek a ni  a. Share holder 400 chuang  neiin Board of Directors leh CEO te pawh an nei a. Nimin chawhnu khan shareholders kalkhawn te chuan Board of Directors thar turte an thlang a ni.