Nimin khan Excise and Narcotics Department Lunglei Office thar lawmna hun hman a ni a. Lunglei High Powered Committee Chairman Pu Lawmawma Tochhawng in a hmanpui. He hunah hian Excise and Narcotics Department hnathawkte bakah Department dang official - te, media mite leh sawm bik dangte an tel.

He hunah hian Pu Lawmawma Tochhawng chuan Excise and Department Lunglei in office thar changtlung tak an nei chu a lawmpui takzet thu sawiin a hnathawkte ah rilru thar leh phur tharna a thlen ngei a beisei thu a sawi a. Excise and Narcotics chu Department pawimawh tak a ni tiin a hnathawkte tam lo mah se kan khawtlang leh kan ram leh hnam dinchhuahna tura mawhphurna pawimawh tak neitu an ni, a ti a. Lunglei High Powered Committee chu Lunglei District ti hmasawn tura din anih ang ngeiin ei leh bar intodelhna kawngah te, hmasawnna ruhrel (infrastructure) tih changtlung kawngah te, thalaite leh thiam thil neite mahni kutkawiha eizawnna kawng kawhhmuh kawngah te hmalak zel a ni dawn a ni, a ti bawk. END Lunglei office thar chu Department hnathawkte leh mipuiten tangkai taka an hman theih nan duhsakna a hlan a ni.

He hunah hian Aizawl District Excise Deputy Commissioner Pu Z Lalhmangaiha khualzahawm niin Pu Lalhmingthanga, Assistant Commissioner, Lunglei District in lawmthu sawina hun a hmang a ni.