821/2023-2024

Lunglei the 16th June; 2023: Vawiin khan Mizo Upa Pawl Venghlun Unit te chuan an din champha 47 na MUP Run Venghlunah hmanna neiin Agriculture Minister Pu C. Lalrinsanga chuan khuallian niin a hmanpui.

He hun hi Venghlun MUP President Rev. C. Zohmingliana’n a kaihruai a, Agriculture Minister chuan MUP te chu ramin an thu leh hla ngaih pawimawh a tul thu sawiin khawvel ram changkang zawkah kum upa ten ngaihhlut an hlawh thin thu sawiin Mizote pawhin kum upa tawn hriat ngahte chu ngaihhlut nachang kan hriat a ngai a ni, a ti a. MUP te chu an dam chhung hun hlimawm an hman chu a ngaih pawimawh sak thu Pu C. Lalrinsanga chuan sawiin thianghlimna, tlawmngaihna leh intohdelhna kawnga kan pi leh pu ten ngaihdan tha tak an lo neih chu vawn him zel a pawimawh thu a sawi a. Khawtlang inrelbawlna te leh hmasawnna kawnga hmalak hrang hrangah mipuite finchhuahtu ni zel turin a sawm bawk a ni.

Venghlun MUP din champha ah hian MUP Hqrs, Lunglei President Pu B. Lalchungnunga, Venghlun Local Council, Venghlun MHIP Branch leh Venghlun YMA Branch aiawh ten thusawina nan nei bawk a ni.

Venghlun MUP te hian an member kalta te sunna hun an hmanga, Venghlun MUP Unit hi ni 16.6.1976 a din a ni a, tun dinhmunah hian member 171 awmin mipa 66 leh hmeichhia 105 an awmin an dincham lawmnan hian zanriah an kil ho nghal a ni.