No.6503/2020-2021

Vawiin khan Agriculture Minister Pu C.Lalrinsanga hovin FOCUS Mizoram in tunkum financial year chhunga project an kalpui dan leh sawrkar kum thar atana hmachhawp thenkhat te Minister Office-ah thlirhona an nei.

Agriculture Minister Pu C.Lalrinsanga chuan FOCUS Mizoram in a tum ber chu lo neitute chawikan a ni a; district pali- Champhai, Kolasib, Serchip leh Mamit chhunga block 11, khua 272 ah te he project kalpui mek a ni, a ti a. Sawrkar kum thar-ah International Fund for Agriculture Development (IFAD) in a pawmpui theih tur thlai thar quintal 60 vel dah thatna (Cold Storage) work plan proposal-ah tel ni se tiin a sawi. 

Ni 30.09.2020 thleng a Fund dinhmun hi IFAD atang Rs 11,62,03,541 hmuh a ni a, Mizoram sawrkar atangin Rs 63,10,19,436 hmuh a ni bawk a. Fund zawng zawng hmuh belhkhawm Rs 74,72,22,977  a ni a, hman (funds utilised) zat Rs 38,16,57,067 a ni. SCRAM – Society for Climate Resilient Agriculture in Mizoram Account a balance awmzat Rs 39,47,28,639 a ni bawk a. 

FOCUS-Fostering Climate Resilient Upland Farming Systems in the North East hi ni 25.01.2018 ah tan niin, ni 25.01.2024 thleng he project hi kalpui tur a ni a, Agriculture Department chu Nodal Agency a ni.