774/2023-2024

Lunglei the 12th June,2023 : Vawiin chawhnu khan Convention Centre Hall, Lunglei ah Clean Lunglei kum 10 tlin lawmna hun hman a ni. Agriculture Minister Pu C.Lalrinsanga chu khuallian niin HPC Vice-Chairman Pu Lawmawma Tochhawng chu khualzahawm niin an hmanpui.

He hun hi Pu C. Lalhmingmuana, Chief Organiser, Clean Lunglei chuan kaihhruaiin khuallian Pu C. Lalrinsanga chuan Clean Lunglei in chawl lova kum 10 ankal thei chu a lawmpui thu a sawi a, faina leh bawlhhlawh sawngbawl kawngah Lunglei mipuite kan lo thangharh hle tawh avangin lawmawm a ti bawk. Clean Lunglei dintu hmasa Pu Joseph Lalhimpuia, ex MLA leh a thawhpuite hmalakna ah lawmthu a sawi. Clean Lunglei hian theihtawp chhuahin an bei a, institution hrang hrangah te, dawr leh kawtthler ah te faina lama kan mawhphurhna theuh hlenchhuak turin an tlangaupui thin a. Bawlhhlawh awm tir tu chu mihringte kan ni a, a awmlohna hmun a a awm vangin bawlhhlawh a nih thin thu sawiin plastic leh sarang te hian lui leh lui dunga nungcha te thlengin a nghawng thu a sawi bawk. Faina leh thianghlimna hi zirlai naupang te atanga zir tir an ngaih thu sawiin bawlhhlawh paih kawngah thangharh lo mi tam tak an la awm chu pawi a ti a, bawlhhlawh paih kawngah midangte zirtirna pek a ngaih thu a sawi bawk. Tuna kan kal chin chin ah chuan hmasawn tawh tak kan ni tiin kan tawngkam hmanah te pawh fimkhur ila, he thianghlimna hian huam tel se la. Tawngkam tha leh mawi kan chin than a ngai a ni. Kum 10 chhung an hmalak leh anlo thawhna te chu fakawm tiin an hnathawh hi Lunglei mipuite ah thangkhawk se a duh a. An hmalakna te hi ti thuanawp lova an hnung zui turin kalkhawmte a chah a ni.

Khualzahawm HPC Vice-Chairman Pu Lawmawma Tochhawng pawhin thu sawiin Faina hlut nachang hriaa lo kal te leh Clean Lunglei hmalatu te chungah lawmthu a sawi a. Pawl engemaw zat a lo ding tawh a, kum reilo te a hlamzuih lehnghal a tam hle, mahse Clean Lunglei hian kum 10 a tling thei a, a tlin theih chhan chu thawh ho na tha tak hnuaiah inrelbawlna tha tak an neih vang a ni. Midang phut loa hlenchhuah tumna rilru,a bul tum tu ni a midang in an tih loh pawhin keichuan ka ti ang, ti tlat tu in telkhawm an nih vang a ni e,a ti a. Tumruhna leh inpekna tel lo chuan fai duhna ringawt chu a kimlo a, inpekna a ngai bawk a ni. Midang tan a inpekna chuan rah tha a rawn siam a, chutiang a inpe member tlem te awmna he pawl hian kum 10 a upa a thlen theih phah a ni, a ti bawk.

Clean Lunglei Assistant Secretary Pu Gilbert Renthlei chuan report pein Clean Lunglei hi 12th July, 2013 a din a ni a, hmalakna thenkhat tarlangin Sanitation Volunteer din te, Khawpui tihfai hnatlang, hmun bik tihfai hnatlang, bawlhhlawm bawm sem leh bawlhhlawh halna siam, awareness campaign school leh college, cable TV leh talkshow te neiin khawpui hmun hrang hrangah signboard hoarding te tar niin Zotlang leh Ramthar khamah Wirefencing te dah a ni, a ti.

Clean Lunglei kum 10 tlin lawmna pual hian Essay, Slogan, Mobile Photography Competition buatsaih a ni a. Lawmman dawngtute chu:

Essay Competition :

Higher Secondary Section-

1st Prize - Lalrothanga Chhakchhuak, Class 12 Science BHSS

2nd Prize - Lawmnasangzuali, Class 12 Arts BHSS

3rd Prize - Lalruathlui, Class 12 BHSS

College-

1st Prize - Lalhmangaihsangi, BA 6th sem, LGC

2nd Prize - Jacob Rohluzuala, BA 4th Sem LGC

3rd Prize - LH Jonathan Vanlalruata, Nagaland University

Slogan Competition :

1st Prize - Village Council Salem Veng

2nd Prize - Lalrinawma, Chanmari II

3rd Prize - Lalchungnunga, Salem Veng

Mobile Photography Competition :

1st Prize - C. Lalruatfela, Electric Veng

2nd Prize - Lalruatkima, Serkawn

3rd Prize - R. Malsawmdawngkimi, Chanmari II

Heng lawmman bakah hian Special award, Lunglei tana faina kawnga hma la tha- Pu Lalsanglura, Rahsi Veng leh Lallianpuia Salem Veng te hnenah hlan an ni bawk.

He hunah hian UD & PA, PHE, LMC, Local Council, NGOs, Assam Rifles, BSF, Police, School hrang hrang NSS leh Media te an tel a ni.