775/2023-2024

Mamit 13th June, 2023 : Vawiin khan District Jail, Mamit-ah Integrated STI, HIV, TB and Hepatitis (ISHTH) Campaign neih a ni a. Dr. Zothankhuma Chhakchhuak, CMO, Mamit chuan Campaign hi a hawng.

Campaign hawngtu Dr. Zothankhuma chuan STI avangin natna sawmthum chuang inkaichhawn theih a awm a, chuvangin mipat hmeichhiatna hman kawngah kan fimkhur a tul hle a, nupa kar ni lo-ah chuan sex hman loh tur a ni tiin damdawi hmanga inchiu thin te'n Syringe an inhman tawm thin avangin natna hlauhawm tak tak kai theih a ni bawk a, theihtawp tak meuha kan fimkhur a tul a ni a ti.

Dr. Lalrinfela H, District Medical Superintendent, Mamit chuan Jail tangte-ah AIDS, TB leh Hepatitis vei kan awm thin avangin an tan damdawi in an chhawp hnaihsak thu sawiin damdawi leh a enkawlna senso zawng zawngte athlawn vek a nih tur thu a sawi.

He hun hi Dr. Lalnuntluangi Khiangte, District AIDS Control Officer chuan kaihruaiin Pu Hmingchungnunga, Dots Plus Supervisor, District TB Control, Mamit chuan lawmthu a sawi a. Mamit Health Department a thawktute bakah District Aids Prevention Control Unit (DAPCU), Aizawl atangin mi pahnihin an rawn telpui bawk a ni. District Jail, Mamit-ah hian tang mipa 60 leh hmeichhia 3 an awm mek a ni.

He hunah hian Health Checkup neih zui nghal a ni a. Mamit khawpui chhung leh khaw chhehvela Home hrang hrangah te ISHTH Health Checkup hi neih chhunzawm a ni ang.