773/2023-2024

Kolasib dated 12th June 2023: Vawiin khan Pu K.Lalrinliana, Minister, Food, Civil Supplies & Consumer Affairs Department chuan Northeast Special Infrastructure Development Scheme kaltlang a khum 100 awm theihna tur Kolasib District Hospital sak mek a tlawh a. Dialysis Building, Blood bank, Laboratory leh ward hrang hrang a endik a. District Hospital-in bawlhhlawh tih ral kawng a harsatna an neih te an sawi ho nghal bawk a ni.

Minister Pu K.Lalrinliana chuan Kolasib district mipuite hriselna tur a inenkawlna hmun changtlung zawk a awm theih nan NESIDS hnuai ah khan 100 awm theihna tur District Hospital sak mek chu lawmawm a tih thu a sawi a. A nih dan tur ang tak a sak a nih theih nan PWD lam a thawktuten uluk tak a an vilpui a ṭul thu leh hmanrua hman leh a sak dan ah duhthusam lohna lai a awm a nih chuan ennawn leh ṭul ang a siamṭha vat ṭhin turin thawktute a chah bawk a ni. District Hospital Blood Bank-a thawktu indaih lohna phuhruk a nih theih nan MLA fund hmangin thawktu pakhat ruahman nghal a nih tur thu leh Laboratory-ah Thyroid Function Test kalpui theihna tur khawl bun a nih theih nana hmalak dan tur sawi a ni a. Bawlhhlawh hal ralna hmun hman chhumzawm theih a nih tak loh avanga District Hospital-in harsatna a tawh mek sutkian a nih theih nan June ni 14 hian District Urban Development Office hotute nen sawi ho tur a tih a ni.

District Civil Supplies Office a tlawhna ah hian Minister chuan Supply Godown-a buhfai dinhmun enin a ṭhat leh ṭhat loh te a endik a. National Food Security Mission hnuai a chhawngkaw tin in chanvo an neih te dik tak a pekchhuah a nih theih nan ṭhahnemngai tak a thawk zel turin thawktute a chah. Minister hian Fast Track Court, Project veng a sak lai mek chu a tlawh nghal bawk a ni. 

Pu K.Lalrinliana'n Chakai Farm, Dumlui a tlawhna ah hian Pi Lallianpuii, DFDO chuan Farm chu kar tin an vilpui thu leh tun dinhmun ah Farm Pond engemaw zah ah Chakai an inthlapun tawh thu leh hrisel takin an enkawl mek thu a sawi a ni.

Attachment

  • Loading attachment...