635/2022-2023
Aizawl the 25th May , 2022 : Agriculture Department buatsaih ni hnih awh State Level Agriculture Officers’ Meet chu ni 24 -25 May, 2022 chhung khan Agriculture Conference Hall, Aizawl-ah neih a ni a. Hripui leng avanga kum 3 zet hetiang intawhkhawm hi an neih theih tawh loh hnuin he hun hmang tur hian Mizoram hmun hrang hranga Agriculture Department-a officer te an kalkhawm a ni.

Vawiin Agriculture Officers’ Meet ni hnihna leh hmawrbawkna chu Agriculture Secretary Pu J. Hmingthanmawia, IAS-in a kaihruai a, Agriculture Minister Pu C. Lalrinsanga chu khuallian niin he hun hi a hmanpui bawk. Agriculture Department chu restructure a lo nih tak avangin Office pawh Directorate leh District Level bakah Block-ah te a lo awm ta a. Office kalphung a lo danglam a, staff leh infrastructure indaih lohna nen chak zawka loneitute tan hna thawh a nih theih nan vawiin khan Department Officer te leh Secretary leh Minister te chuan sawihona hun an hmang nghal a ni.

Khuallian Agriculture Minister Pu C. Lalrinsanga chuan thu sawiin sorkar hmalakna kal mek ‘Socio-Economic Development Programme (SEDP)’ hnuaia Vaimim chinte chu a hlawhtlin a, rah tha a chhuah ngei theih nan fimkhur leh thahnemngai taka kalpui a tul thu a sawi a. Hetih lai hian Vaimim eichhetu pangang ‘Fall Army Worm’ a lo lan leh tak avangin thawhrim lehzual a ngaih thu a sawi bawk. Loneitute hmasawn zel theih nan Horticulture leh Cooperation department te nena thawhhona tha neih a pawimawh zel dawn tih thu sawiin Minsiter chuan farming kalphung tur uluk zawka duan leh zawm a ni theih nan FOCUS hnuaiah Integrated Farming kalpui chu sorkarin a tum a ti. Mizoramah lentil / pulses (daal) chin chhin pawh a tha duh hle tih hriat a ni tawh a, ramchhungah lentil indaihlohna phuhruk turin Mizoramah lentil pawh tun aia uar zawka tharchhuah (mass production) chu kalpui a fuh a rin thu a sawi. SEDP hnuaiah tlangram loneih chauh ni lovin Wet Rice Cultivation pawh tihchangtlun zel tum a nih thu te, district tinah vaimim dah thatna (silo) sak te leh vaimim leh bekang herna khawl dah chu hmachhawp pawimawh tak a ni tih Minister chuan a sawi bawk.

Nimin (24.5.2022) intawhkhawmna ni khatna Agriculre Department Additional Director Pu James Vanlalluaia kaihhruaiah Agriculture Director Pu James Lalsiamliana chuan Meet hmangtu zawng zawngte lawmna thu a sawi a. Ei leh bar tam zawk tharchhuak tura sorkar ruahmanna leh hmalakna hrang hrangte tihhlawhtlin a nih theih nan thahnem ngai taka thawk zel turin Agriculture Officer-te a sawm. Ruat bik ten Agriculture Department hmalakna leh hmachhawp chi hrang hrangte an sawi a, sawihona hun tha tak an hmang zui a ni. Sorkar hmalakna kal mek SEDP te, tun hnaia Fall Army Worm rawn puang leh chungchang te bakah lei tha (fertilizer) chungchanga Mizoram leh India rampumin harsatna a tawh mek pawh sawilan a ni a. A bikin DAP leh MOP te chu state dangte pawhin an chan tur zat an hmu thei rih bik lova, Mizoram chan tur fertilizer (quota) te chu Bairabi Rake Point kaltlang chauha lakluh thin a ni a, fertilizer tawlh ruk man thin te chu Mizoram chan tur (quota) a ni lo tihte pawh sawilan a ni.

Mizorama Oil palm chin kalpui mek chungchang pawh sawiho niin loneitute Oil Palm rah tharchhuah hralhna chu Kg. ah Rs.5.50 atangin Rs.10.00 ah tihpun a ni ta chu a lawmawm hle a, Oil Palm ching enkawl tha lote pawhin an thar thawh leh mek thu pawh sawi a ni. Mizoram a Oil Palm chin chungchang zir chiangtu tur mithiam rual ‘Study Team’ sorkarin a din chu lawmawm an tih thu an sawi bawk.