5011/2025-2026

27th March, 2026 : Nimin khan Kochi, Kerala-ah Agriculture & Farmers’ Welfare changtu Minister Pu PC Vanlalruata chuan Directorate of Cashew nut & Cocoa hotute leh Spices Board of India te an pisa-ah tlawhin, inkawmna hun an hmang.

Directorate of Cashew nut & Cocoa hi Government of India, Ministry of Agriculture & Farmers’ Welfare hnuaia awm an ni a, an Director Dr Femina leh a staff te’n Minister hi zing dar 11-ah an lo dawng sawng. He meeting-ah hian Dr Femina chuan presentation te pe-in, Mizorama Cocoa that theih dan te sawifiahin loneitute hmasawnna tur atan uar taka cocoa ching ve turin Minister chu a lo sawm a; hemi kawngah hian Government of India chuan kawng hrang hrangah tanpuina pek an inhuam thu a sawi.

Hemi ni vek chawhnu dar 12:30-ah Spices Board of India (Ministry of Commerce & Industries, Government of India) hotute nen meeting nei lehin, an Secretary Pi P. Hemalatha chuan Minister a lo dawngsawng. Spices crop lamah Mizoram hmasawnna tur hrang hrang a awm thute leh a bikin Mizo hmarcha (Mizo Birds Eye Chilli)-ah market demand a that thu lo sawiin nasa lehzual zawka thar chhhuah a nih theih nan Government of India leh Mizoram Sawrkar te’n thawhhona tha zawk neih chhoh zel ni se tih a ni. Spices Board of India hotute nen hian chawhlui an kil nghal bawk.

Agriculture Minister Pu PC Vanlalruata hi Agriculture & Farmers’ Welfare Department atangin Secretary Pi Ramdinliani; Consultant Pu Tlangtimawia Zote leh ADAO Pu Lalrinzuala te’n an tawiawm.