5010/2025-2026

Thenzawl the 27th March 2026: Vawiin khan Chief Minister Pu Lalduhoma chuan PWD Complex, Thenzawlah Thenzawl PWD Road Division a hawng. Pu B. Lalchhanzova, I&PR Minister leh Pu T. Lalhlimpuia, MLA ten Chief Minister hi a tawiawm.

Thu sawiin Chief Minister chuan, PWD tana ni chhinchhiahtlak, Thenzawl mipuite tana chanchin lawmawm, Mizoramin hma kan sawn zelna kawnga kan tangkaipui tur Thenzawl PWD Road Division thar kan hawng thei ta a. Sorkar pawh kan lawm hle a ni.

Mizoramin kum 20 zet rambuai kan tawrh avangin hmasawnna lamah kan hnufual bik a, Infrastructure-ah te, Industry leh Investment lamah te state dangte kan phak lo hle a. Kan road density te hi state dangte nena khaikhinin a la hniam bik hle a. India ram road density chawhrual hi km 100 biala km 116 zel a nih laiin Mizoramin kawngpui a neih zat chu Km 100 bialah Km 46.37 chauh a la ni a. India ram average zatve pawh kan la phak lova, hnathawh tur hi kan la ngah hle a ni.

Thawh tur a tam a, hma kan la nasa a. Hna a pun a, thawktu lam kan pun si loh chuan kan kal chak thei si lova. Chak zawka hna kan thawh theih nana pawimawh tak pakhat chu Thenzawl Division thar leh Biate Sub Division thar hawn hi an ni.

Enga ti nge Thenzawlah kher, CM bial a nih vang em ni? Tih zawhna a awm thei a. Vawi tam tak kan lo sawi tawh thin angin Thenzawlah hian PEACE CITY din tur a ni a, Master Plan kan siam mek a. SASCI atangin Peace City chhunga kalpui turin Greenfield City Project kan thehluh tawh bawk a. Tourism lam project lian tak tak, Ropeway te, Vanva lui khuah te, Lau project te, Heliport te, Sericulture P3 Unit te leh thil dang dang kalpui kan tum mek bawk a. Neihloh khua hi Disaster thil avangin hmun danga sawn tumin hma kan la mek bawk si a. He lai velah hian PWD khawih chi project hi tam tham tak a rawn piang dawn a. Chuvang chuan, Thenzawla Division hawn hi thil tul tak a ni.

Thenzawl Sub-division hian Aizawl – Thenzawl – Lunglei kawng, Mizoram State Highway pawimawh ber a enkawl mek a. Kawng pawimawh dang Thenzawl - Buarpui a enkawl bawk a. Hna thar lo awm tur ngaihtuah tel miah lo pawh ni ila, he Division thar hian thawh tur a ngah sa em em tho a ni, a ti a. Office thara thawktute leh PWD office hrang hranga thawktute duhsakna hlanin, a hnathawhte leh an ruahmannate chuan kan ram hmakhua a hril a ni tih hre chung a, theihtawp chhuaha lo thawk zel turin a chah a ni.

Pu T. Lalhlimpuia, MLA pawhin thusawiin, sorkar hi inrenchem takin bul kan tan a, hmathlir thui tak nei chungin Chief Minister-in min kaihruai a, hun reilote chhungin hmasawnna thar chi hrang hrang kan hmu chho ta a. Thenzawl PWD Division thar pawh hi chung zinga mi chu a ni, a ti.

Pu B. Lalrinliana,Thenzawl Jt. VC aiawh pawhin thu a sawi a, niminah Thenzawl damdawiinah Ultrasound khawl thar a rawn thleng a, vawiinah PWD Road Division thar kan hawng a, chawhnu lamah hian Lo Tha Zawla phullem phahna lungphum kan phum dawn bawk a. Thenzawl hian thil tha kan dawng nasa a, sorkar chungah kan lawm a ni, a ti.

A hawnna inkhawm hi Pu V. Lalsangliana, Commissioner & Secretary, PWD in a kaihruai a, Rev. T. Thuamlianan hunserh a hmang a, Er. H. Zoramliana, E-in-C, PWD chuan report a pe a ni. Thenzawl Road Division thar atan hian EE  post 1, JE post 2, UDC post 2, leh a dangte sorkarin a siam tawh a, post thenkhat lak phalna pek an ni tawh a, thawktu awmsate siam remin April ni 1 atang hian mipuite dawr theih an ni ang.