4778/2024-2025

Dated Serchhip, the 24^th March, 2025: Tukin khan Agriculture Minister Pu PC Vanlalruata hovin  Serchhip DC Meeting Hall ah District Agriculture Marketing Committee an thukhawm a. Serchhip DAMC Chairman Pu Paul L Khuma’n he hun hi a kaihruai a ni.

Minister Pu PC Vanlalruata chuan thlai thar market system mumal tak Mizoramah kalpui chhoh tumin sawrkar chuan hma a la a, bul an la tan chauh avangin fel lo leh tihsual palh a awm lo thei lo a, amaherawhchu kuthnathawktute tana theihtawp chhuaha ke pen zel an tum thu a sawi a. A bul tannaah famkim vek thei lo mah se kum thar lamah chuan hei aia felfai zawka an kalpui theih a beisei thu a sawi. Kumin February ni 20 atangin sawrkar chuan sawhthing a lei tan a, a thawhhnihnaah chuan support price base a kalpui tum a nih thu vawiin hian a sawi bawk.

Serchhip DAMC hmalakna fakin Agriculture Minister chuan District titha ber te zingah an tel thu a sawi a. Sawrkar hnathawkte hahzia a hriatpui thu leh loneitute tana thawk an nih inhria a, thahnemngai taka thawk chhunzawm zel turin a fuih a. SCC te pawh anmahni kea an din theih thuai an beisei thu sawiin, sawkar hnathawk te chu anmahni chan bik SCC te uluk taka kaihruai chhunzawm zel turin a sawm a ni.

Vawiin meeting-ah hian Serchhip DAMC chuan an harsatna tawh hrang hrang te Minister hnenah hian an thlen a. Auction kalphung chungchanga rawtna thar an neih te, sawrkar hnathawk co-ordinator a ruat te chungchang te leh thawktute inrelbawlna chungchang te Minister hnenah an thlen a ni.

Serchhip District ah hian SCC pasarih awmin, Sawhthing 3302 quintals hralhchhuah tawh a ni a. 1st installment a sum hmuh cheng vaibelchhe 2.625 chu loneitute account ah thun fel a ni tawh a. 2nd installment hi thun leh mek niin loneitute account fel lo tlem awm te chinfel a ni a, vawiin lamah hian thun kim hman beisei a ni.