4779/2024-2025 

Dated Serchhip, the 24^th March, 2025: Vawiin khan Serchhipah 'World TB Day 2025' pualin hun hman a ni a. Serchhip DC Pisapui Hall-a programme buatsaihah hian Agriculture Minister Pu PC Vanlalruata, Tuikum bialtu MLA chu khuallian a ni. 

Kumin 'World TB Day' thupui hi 'Yes we can end TB: Commit, Invest, Deliver' tih a ni a. Vawiin programme hi District Bawrhsap Pu Paul L.Khuma'n a kaihruai a ni. 

Khuallian Pu PC Vanlalruata chuan thu sawiin, ngawr tia sawi thin TB natna hi tunhma lamin kan pi leh pu te chuan natna tihbaiawm, tihdam theihloha an ngaih avangin an hlau em em a, a vei te pawh an tih thin a. Tunlai khawvelah erawh damdawi tha tak a awm tawh a, India sawrkar pawhin chak takin TB natna do let hna a thawk a, kum 5 lo kal leh turah phei chuan TB hi India ram atanga umbo an inbeisei tawh thu Minister chuan a sawi. TB dona leh TB natna  veite enkawlna  kawngah pawh tangrual zel turin mipuite a sawm a. TB natna vei ten ei leh in tha an dawn theihna atana sum leh paia tanpuitu Nikshay Mitra Donor ah tang theuh turin kalkhawmte a sawm a, amah ngei pawh Donor a nih mek thu leh Serchhip District ah pawh Donor nih leh a tum thu a sawi a. Mizo society chu inpawh tlang tak leh inkawmngeih kan nih angin natna do kawngah tangrual zel turin mipuite a sawm nghal bawk a ni. 

He hunah hian Dr Lallawmkimi Chhakchhuak, District TB Officer, Serchhip chuan 100 Days TB Campaign nih phung a sawi a. December ni 9, 2024 ah khan Serchhip, Aizawl, Champhai leh Mamit District-ah te hawn a nih thu sawiin he campaign hian ni 100 a awh dawn a ni, a ti. Serchhip District ah hian khua zawng zawng an tuam chhuak tawh a, TB hrik pai endik tur an target mi 9863 chu khumin mi 11094 an endik tawh a ni. TB Statistic 2025-a a lan danin Serchhip District ah TB vei mi 41 an awm a, Mizoram puma TB vei zat hi 437 an ni.  

Nikshay Mitra Donors programme hnuaia TB natna vei mek sponsor tute hnenah vawiin programme ah hian citation sem a ni a. TB Free village 9 te hnenah lawmman sem a ni bawk. Hmuntha hian kum 2 a zawna TB free village an nih theih avangin silver an dawng a. Bungtlang, Lungpho, Ngentiang, Lungkawlh, Sailulak, Leng, Khumtung, Serchhip Field veng te chu a vawikhatna atan TB free village a puan an nih avangin bronze an dawng a ni.  

TB natna laka damna lo chang tawh tu Pu Lalramnghaka Kawlni, Serchhip hnen atanga thusawi tawi ngaihthlak a ni a. Sr CMO Dr LP Malsawma, Additional DC Pu Lalrinzuala, Serchhip District a Head of Office hrang hrang te leh mipui thahnem tak he hunah hian an tel a ni.