Vawiin chawhma khan Directorate of Agriculture Conference Hall ah kum liamta chhunga Agriculture a Mizoram sawrkar hmalakna leh hlawhtlinna te Agriculture Minister Pu R.Lalzirliana hovin thlir let a ni.

Agriculture Minister Pu R.Lalzirliana chuan Agriculture ah hlawhtlinna tamtak hmuh tur a awm avanga lawmawm a tih thu sawiin sawrkar hmalakna in loneitute pawh nasa taka a tih phur chhoh mek thu a sawi a. Agriculture mithiamte chu nasa zawka thlawhhma te leh kuthnathawktute hmalakna hmunhma te pawh thlawh thin tura fuihin - loneituten anmahni tlawhtu mithiam te hnen atanga zir thar tur an neih thin bakah puih duhtu leh phurpuitu an nei tih an lo hmuh hian phurna an neih phah thin a ni ni a ti. Sawrkar mithiamte leh hnathawk te chu midang tana zir leh mipui rawngbawl hna thawk tura sawrkar in hlawh a pek an ni a ti a. Agriculture mithiam te chuan tan an lak chhoh zel phawt chuan buh leh bal a Mizoram tharchhuahte chu eikhawp a ni thuai dawn a ni a ti.

Agrilculture Department(Crop Husbandry) hnathawh thlirletna hun hi Pu Lalhmingthanga, Secretary, Agriculture in a kaihruai a. He hunah hian District officer te pawh he hunah hian an tel a, infuihtharlehna hun hman niin hun then hnihna ah technical thil bik sawihona leh zirchianna te neih a ni.

Dr. C. Lalzarliana, Director, Agriculture Department(CH) in Agriculture Department kaltlanga sawrkar hlawhtlinna hrang hrang zinga liantham deuh a tarlan dan chuan - Mizoram chhunga leilet, buh chin theihna hmun atan finfiah theih zauzawng chu 74,644 Ha niin kum 2015-16 chhung khan 17,302 Ha a zau ah leilet siam a ni a, kum 2014-15 ah chuan leilet zauzawng hi 16,866 Ha ah leilet siam a ni tawh a. Leilet(WRC) zauhna hi 2.59% a ni a. Hetih lai hian tlangram loneihna hmun(jhum cultivation area) chu 19,851 Ha ah tihzim niin kum 2014-15 kha chuan 20,064 ha a zau ah tlangram lo hi neih a ni. Oil Palm ah pawh nasa taka hmalak niin kum 2014-15 a 20,377 Ha a zau a hmalakna neih kha kum 2015-16 chhungin 23,358 ha ah zauh a ni. Leilet leh tlangram lo atanga buh tharchhuah zawng zawng belhkhawm chu 62,089 MT niin kum hmasa a tharchhuah aiin 2.24 % in a tam zawk a. Hetih lai hian thlai leh thlasik thlai thar chhuah pawh pung chhovin 37746 MT thar a ni a, kum 2014-15 chhung khan 37096 MT tharchhuah a ni thung. Oil palm chinna hmun pawh kum 2014-15 a 20,377 Ha a zau ni thin khan kum 2015-16 ah chuan 23,358 Ha ah zauh niin March 2016 thlenga Oil Palm rah sawr tur tharchhuah zat chu 8,954.36 MT a ni a. Oil Palm FFB Metric tonne(MT) pakhat hi Cheng 5,500/- ah chhut a ni. Tunah hian loneitute hawh theih tur lirthei leh hmanrua hawh theihna hmun, custom hiring centre hmun 57 ah a awm mek a ni.