Sorkar laipui, Ministry of Agriculture-in thlai chi hrang hrang, a ram sik leh sa leh leilung mil zela chin tura ruahmanna siam tura State tinte a hriattirna bawhzuiin vawiin khan Pu Lalram Thanga, IFS, Principal Secretary, Agriculture hovin Agriculture Committee Room-ah meeting neih a ni .
Meeting-ah hian Agriculture Department hnuaia thlai chi hrang hrang – Buh, Vaimim, Be lam chi, Hriak pai thlai leh Fu chi, Mizorama chin mek te, thlai chi tha thar hlawk chi hmun dang atanga lakluh te leh ICAR, Mizoram Complex, Kolasib leh KVK hrang hrang ten an lo enchhin tawh, Mizoram tana tha tur nia hriatte chipchiar takin sawiho a niin a chinna tur hmun azira thlai chi thar hlawk tur te pawh thlan nghal a ni. Hei bakah hian tun hnaia Champhai leilet-a buh natna chi hrang hrang leh buh eichhetu rannung chi hrang hrang, Agriculture Department mi thiamte, ICAR Scientist te leh KVK Scientist te nena an zirho dante a lem nen entir a, chipchiar taka zirho nghal a niin kum thar lama heng buh natna leh rannung laka inven dan turte pawh rawtna mumal tak siam nghal a ni bawk.
He hunah hian Agriculture Director pahnih, Dr. C. Lalzarliana leh Pu C. Lalniliana te bakah Agriculture Department-a Officer pawimawh te, ICAR, Kolasib-a Scientist te leh KVK-a mi thiamte an tel a ni.
