Nimin Dt 7.8.2013 chawhnu dar 2:00 Pm khan Lawngtlai District Research Officer Office chu Pu. C. Ngunlianchunga, CEM, LADC chuan a hawng. Office thar atan hian Lawngtlai Electric venga Pu H. Chalhranga Building luah hawh rih a ni a.

He Office thar hawnna a khuallian Pu. C. Ngunlianchunga chuan Lawngtlai District hian tun sawrkar chhungin thil tha kan dawng nasa em em a, Council hmingin lawmthu ka sawi a ni a ti a, hetianga Research Office thar an nei ta chu hmasawnna ruhrel siam dawna thil pawimawh lamkhawm thuah nasa taka hma an sawn pui ngei a beisei thu sawiin Certificate pawimawh la chhuak tura hmun hla taka kal a ngai thin pawh a ziaawm a beisei thu a sawi bawk. CEM hian Office Building anmahni puala an neih theihna tura an puih theihna ang angah chak taka an tanpui zel tur thu pawh a sawi a ni.

District Bawrhsap aiawha thusawitu Pu. Lalsangluaia, Addl D.C pawhin Department of Economics and Statistics hnuaia District Office thar Lawngtlaia a awm ta chu a lawmawm hle a ni a ti a, an hmunhma turte pawh a rang lama ngaihtuah thuai a nih a beisei thu a sawi a ni.

He inkhawm hi Pu Saihlira, Director Department of Economics and Statistics chuan a kaihruaia, Pu Lalrikhuma, Joint Director chuan Statistics Tangkaina leh Pawimawhna tih thupui hmangin thu a sawi bawk.

He Office thar hawnna ah hian Department hrang hranga District Officer te an kal tha hle a, District Council sawrkara Council Member thahnem takin an hman pui bawk. Office thar ah hian Research Officer Pu H. Biakchhunga leh a thawhpui; an vaiin mi panga ten an thutchilh nghal dawn a ni.

Tlai lamah zanriah tuihnai tak kilho zui nghal a ni.