Vawiin khan Agriculture Committee Room-ah Pu Lalhmingthanga, IAS, Secretary, Agriculture Department hovin Agriculture Department – Crop Husbandry leh Research & Education-a Officer-ten Joint Meeting an nei.

Pu Lalhmingthanga chuan hmasawnna tak tak thlen tur chuan thawhhona tha a pawimawh thu sawiin eng ang harsatna pawh lo thleng se sawiho thei dinhmuna ding fo thei turin Officer kalkhawmte a chah a. Sorkar hnathawhna kawng hrang hrangah taima tak leh rinawm tak, langtlang taka thawk thin tur te, mahni invawng uluk tur tein kalkhawmte a chah bawk.

Secretary chuan Department-in National Award a lo dawn tawhte chu thawktute thahnemngaihna rah a nih thu sawiin tunah pawh Award hmu leh mai thei dinhmuna Department a ding chu lawmawm a tih thu a sawi bawk.

He Joint Meeting-ah hian Dr. C. Lalzarliana, Director of Agriculture (Crop Husbandry) chuan Key Note Address pein Secretary thar hova hun hman theih a ni chu lawmawm a tih rualin Department hnathawh leh hmathlirte a rawn hmuhpui thei chuan hnathawh zel turah hmasawnna rah tha tak a chhuah a beisei thu a sawi.

Meeting-ah hian chawhma lamah Agriculture (Crop Husbandry) hnuaia Scheme hrang hrang kalpui mek a nih dan te Power Point hmanga entir niin Research & Education hnuaia hnathawh leh kalphung te tarlan a ni bawk.

Chawhnu lamah Technical Session hmangin Thlaichi tha siam chhuah dan te, Krishi Vigyan Kendra (KVK)-in Rastrya Vikas Yogona (RKVY) Scheme hnuaia a hnathawh hrang hrang leh National Food Security Mission (NFSM) hnuaia thlai chin dan phung hrang hrang-a Demonstration a lo neih te zirho a ni bawk.

Mizoram-ah Oil Palm chin uar chhoh zel a nih laia tanlak zual zel a ngaih thu te leh tun aia thar hlawk zawka hmalak dan turte sawiho a ni. Meeting-ah hian Vigore Premium hmanga buh thar tihhma dan chungchanga hmalak mekte tarlan a ni bawk.

He Joint Meeting-ah hian Department pahniha Officer-te bakah KVK-a Programme Coordinator-te telin sawihona hun tha tak neih a ni.