3802/2022-2023

Kolasib dated 10th March 2023: Vawiin khan Kolasib District Oil Palm Growers’ Association buatsaihin Diakkawn YMA Hall-ah a vawi 1-na atan Mizoram Oil Palm Inkhawmpui neih a ni a. He hun ah hian Pu J.Hmingthanmawia, IAS, Secretary, Agriculture Department chu khuallian niin Pu John LT Sanga, Deputy Commissioner chu khual zahawm a ni bawk.

Pu J.Hmingthanmawia, IAS, Secretary, Agriculture Department chuan Inkhawmpui buatsaih thei a Oil Palm Growers’ Association hruaitute thawhrimna leh inpekna chu fakawm a tih thu sawiin hei hian Oil Palm chu thlai innghahna tlak leh buaipui tlak a nih zia a lantir thu a sawi a. Mizoram chhunga Oil Palm chin theihna hmun a ngaih, zaa 24 bawr vel chu Kolasib district chhungah a awm thu tarlangin tunlai thiamna leh hmanrua te nen tangkawpin Oil Palm rah tam zawk tharchhuahna hmun ah Kolasib district chu a siam theih thu a sawi. Oil Palm avanga sik leh sa leh ram leilung hausakna a chhe zawng a nghawng awm thei awm a sawi thin te zirchiang turin Mizoramah Pilot Research Studies kalpui mek a nih thu Pu J.Hmingthanmawia chuan sawiin hemi hnuai ah hian Agriculture department leh a kaihhnawih department chhunga mithiam thlanchhuah te an awm thu a sawi a. Mihring nitin khawsak phung a tel (Edible Oil) mamawhna sang zel avanga India ram pawn atanga tel tam tham tak chah luh thin chhawk zangkhai nan National Mission on Edible Oil – Oil Palm (NMEO-OP) hnuai ah sawrkar laipui chuan India ram chhung ngei a Oil Palm rah thahnem zawk tharchhuah a nih theih nan hma a lak mek thu a sawi. Mizoram hmar lam a Oil Plam chingtute Oil Plam rah lei turin Godrej Agrovet Ltd. an awm mai bak ah chhim lam a Oil Plam rah lei turin Patanjali Foods Ltd.-te changtlung zawk a inbun turin ruahmanna kalpui mek a nih thu Agriculture Secretary chuan sawiin Oil Plam rah hralhna man te pawh ennawn zel a nih avangin kuthnathawktute tan innghahnatlak leh rintlak a nih thu a sawi.

Pu John LT Sanga, Deputy Commissoner chuan ram hausakna hai chhuak tur chuan kuthnathawktute an pawimawh thu leh hlawhtling tur chuan ruahmanna thui tak siam chung a awmze nei tak a hmalakna kalpui a tul thu a sawi a. Chumi tur chuan Kolasib district chhunga Sawrkar department hrang hranga mithiam te rawn thin turin kalkhawm te a chah. Kolasib chu State luhkapui a nih bak ah inkalpawhna changtlung a awm theih nan Rel kawng siam mek a nih thu leh 4 Lane siam hna kalpui thuai beisei a nih thu a sawi a. Heng hmasawnna ruhrelte hi dinchhuah nana hmang tangkai hmasatu nih tum turin a fuih bawk a ni.

Pu Lalruatkima, Senior Executive, Godrej Agrovet Ltd. tarlan danin kum 2022-23 chhungin Palm Oil Mill, Bukvanneiah Oil Palm rah cheng nuai 600 man hu lei a nih thu leh hemi kaihhnawih ah hian thalai thahnem tak tan inhlawhna siam sak a nih thu a sawi a. Oil Plam chingtute harsatna sutkianpui tur leh an mamawh ang leitha an lei theih nan te, Oil Plam rah hralh tur a Bukvannei Palm Oil Mill pan thei lo te tan Samadhan- One Stop Solution Centre chu Mamit district chhunga bun turin hmalak mek a nih thu a sawi.

Mizoram Oil Palm Inkhawmpui hi Pu H.Darliana, Chairman, Kolasib District Oil Plam Growers’ Association-in a kaihruai a, Pu H.Lalrintluanga, Secretary in report tawi pein Kolasib district chhunga Oil Palm tihhmasawnna kawng a hma la tha zual thlan chhuah 5-te hnen ah chawimawina pek an ni a. Aizawl leh Mamit district-a Oil Palm Framers-ten he hun hi telpuiin Kolasib district chhung a Oil Palm huan tam zawk awmna zau panna kawng siamthat dan tur te sawiho a ni.

Oil Palm hi Kolasib district chhungah 2005-2006 atanga chin tan a ni a. District ram zau zawng (1,38,251 ha.) atanga chhutin Oil palm chin theihna (Potential Area) awm zat hi 14,141 hactare ang a chhut a ni. Partner company- Godrej Agrovet Ltd. ten October ni 28, 2014-ah Oil Palm Mill, Bukvanneiah dinin Oil Palm chingtute atangin Oil Plam rah hi leiin an her reng a ni.

Kolasib District chhungah chhungkaw 278-in Oil Palm an ching mek a, mumal taka a rah hralh thei hi chhungkaw 182 an awm mek bawk a ni. District Potential Area 14,141 hactare atangin Hactare 341.5-ah hmalak tawh ang a chhut a ni.

Oil Palm chingtuten kum 2022-2023 chhungin Oil Plam rah 1,870 Metric ton chu Company-te hnenah hralh chhuak tawh anga chhinchhiah a ni a. Scheme thar- National Mission On Edible Oils-Oil Palm (NMEO-OP) kalpui tan a nih hnu (2022-2023) hian loneitute hnen ah kawng hrang hrangin tanpuina pek thin a ni a. Oil Palm huan siam kawnga hmanrua pawimawh turte sem thin a ni bawk.