3803/2022-2023

Aizawl the 10th March 2023: Vawiin khan Mizoram Government Doctors’ Association (MGDA) chuan an Annual General Conference vawi 37-na chu RB Mc Cabe Hall, Aijal Club ah an hmang a. Deputy Chief Minister Pu Tawnluia chuan khuallian niin he hun hi hmanpui.

Khuallian Deputy Chief Minister chuan Doctor hna chu hna zahawm leh rawngbawlna ropui a ni tiin, tihdam hna an koah a tlak avangin an hnathawh leh mawhphurhna chu hna dang te aia a danglam thu a sawi a, midangte rawngbawl tura kawng zawh zel turin doctor-te chu a sawm a ni. Pu Tawnluia chuan Mizoram Health Service Rules siamthat (restructure) kawngah hma an lo lak tawh thinna te tarlangin, harsatna awm mek chingfel turin DP&AR in hma an lak mek thu leh Cabinet Meeting-a put luh thuai anih a beisei thu a sawi bawk. Hripui vanga hun khirh tak kan hmachhawn chhungin kan doctor-te hnathawh a ropui takzet thu leh an hriatna, thiamna leh belhtlak an nih zia mipuite mithmuhah pholan a ni chu lawmawm a tih thu a sawi bawk a ni.

Pu Tawnluia chuan Smart City Project hnuaiah Damdawiin thli leh bawlhhlawhte (Bio-medical waste) mumal zawka senghawi kawngah sawrkarin theihtawp chhuahin, hemi atan hian Aizawl Solid Waste Management Center, Tuirialah bultan chhoh mek a nih thu a sawi a. Hemi kawngah hian MGDA member-te chu an ngaihtuahnate sengkhawm a, sawrkar hmalaknate puibawm turin a ngen nghal bawk a ni. Mipui ten tangkai zawka Mizoram Health Care Scheme an hman a duhsak thu sawiin, a thei apiang he scheme-a inziaklut turin a sawm a, Asian Development Bank (ADB) Loan hmanga changtlung zawka Health Care Scheme kalpui a nih tur thu a tarlang bawk.

MGDA Annual General Conference hi MGDA Vice President Dr. C. Lalhrekima chuan kaihhruaiin, kum 2019-2023 chhunga an member pension a chhuak ta mi 24-te thlahna hun leh member boral mi 7-te sunna hun an hmang a. Chawhnu lamah hruaitu thar thlanna hun leh business session neih a ni.

Kum 2023-2025 chhunga Mizoram Government Doctors Association hruaitu atana thlan chhuahte chu:

President: Dr. C. Lalhrekima

Vice President: Dr. Lalthlengliani

General Secretary: Dr. C. Lalchhandama

Assistant Secretary: Dr. Zonunsiama

Treasurer: Dr. Zorinsangi; te an ni.