NLUP 2nd Phase hnuaia vawk note sem dan chanchinbu a lo lang chungchangah mipui ten an hriatfiah theih nan AH & Veterinary department chuan hetiang hian thuchhuah a siam:

NLUP 2nd Phase hnuaia vawk vulh thlangtute zingah chhungkaw pakhat zelah vawk note pariat (8) theuh dawng tur an ni a. Beneficiary 7006 awmin, a vaia vawk note mamawh zat chu 56,048 a ni. Heng vawk note te hi Sorkar department enkawl vawk farm te, PIGFED farm te, NLUP hnuaia Piglet Multiplication Centre siam atang te in leh hmun dang dang atanga lakkhawm a nih hnu hian kum hnih chhungin mamawh zat atanga 20% chauh a phuhru thei a. Hemi bakah hian kum 2013 chhunga PRRS hri leng avangin vawk tam tak an thi a. Chutihlai chuan bazar a vawkte man (market rate) chu NLUP approved rate Rs. 3,000 atangin Rs. 3,500 ah a pung chho bawk a. Heng avang hian NLUP Input Purchase Advisory Board (SPAB) meeting, ni 18.6.2013 a neih chuan vawk note man Rs. 3,000 atanga Rs. 3,500 a san tura AH&Vety Department rawtna chu a pawm ta a ni. Vawk note man tihpun a nih hnu hian Department chuan beneficiary 7,006-te hnenah pawisafai a tanpuina (cash assistance) Rs. 7,000 theuh (vawk note pahnih man) kum 2013 khan a sem leh a. Hemi hnu hian vawk note mamawh belh zat chu 42,036 a ni.

Kum 2013 a PRRS hrileng khan Mizoram a nghawng na hle a. Vawkte mamawh zat a aw m loh avangin a semchhuah hna pawh duh angin a kalchak thei lova. Local market-ah vawkte man chu pung chho zelin, vawk note man chu Rs. 4,000/ Rs. 5,000 te ni chho in, work calendar-a vawk note pariat lei nan a Rs. 28,000 ruahman sa (vawk note pakhat Rs. 3,500 hu zel a chhut) chuan a daih dawn ta lo tih a chiang ta a, NLUP kalpui hna (implementation process) chu hun tiam aiin a tlai phah ta zel bawk a ni.

Hengte avang hian 8.9.2014-a Chief Minister hova NLUP High Level Meeting thukhawm chuan NLUP hmalakna tithuanawptu pakhat – vawk note sem tur mamawhna chu sukiang turin leh a leina tur sum ruahman lawk tawh chu tipung tura rawtna a pawm ta a. Beneficiary pakhat tanpuina tura cheng nuai khat zel ruahmanna bawhpel si lova vawk note man sang zel mil a sum sen tur bituk thar in, vawk note pakhat leina atan Rs. 3,500 ruahman chu Rs. 5,000 ah tihpun a ni ta a, beneficiary pakhat tan note pariat (8) ruahman chu paruk (6) ah tihhniam a ni thung ta a ni. NLUP hnuaia vawk note sem tur te hi Champhai leh a vel atang te in local supplier-te kaltlanga sem tur tia rel a ni bawk. Vawk note leina man ti pung a, lei zat tur tihhniam a nih hnu hian vawk note la mamawh zat chu 28,024 a ni.

He High Level meeting thurel bawhzui hian NLUP 2nd Phase hnuaia vawk note sem tur chu private supplier Pu C. Vanlalhmuaka, Zotlang, Champhai chuan September 2014 atanga October 2015 chhung khan a supply ta a. Hemi atan hian expost facto SPAB approval chu SPAB meeting minute Dt. 20.4.2015 leh Government approval vide No.G.11016/3/2013-AH&V/Loose of 25.6.2015) ah pek a ni. Vawk note pakhat Rs.5,000 zela hiasapin vawk note 27,020 man. Cheng vaibelchhe 13.51 chu supplier hnenah pek a ni. Private supplier thlan a nih hma hian District A.H. & Vety Officer-te chuan vawk note awm ang ang dapkhawmin beneficiary-te hnenah an sem bawk a ni.

Vawk note 689 thi awm chungchangah heng vawk note te hi beneficiary-te kut a hlan an nih laiin AH & Veterinary Department chuan a tha niin a hmu a, an hriselna leh piankawngah pawh complaint a awmlo. Vawk note sem hna zawh vek a nih hnu pawhin thi zat 36.81% nia sawi chu Department-ah report thehluh a awm lo bawk a ni.

AH & Veterinary Department chuan beneficiary-te kuta an awm laiin vawk note thenkhat an thi tih chu a pawm a. District A.H. & Vety Officer-ten uluk takin an endik atangin vawk note thih chhan tur awm ang natna hrik emaw hrileng emaw puh tur an hmulo a ni.