Ni hnih awh tur ‘Orientation and refreshers Training for Urban ASHA’ chu vawiin khan Aizawl Civil Hospital Conference Hall-ah neih a ni a, he hunah hian National Urban Health Mission hnuaia ASHA (Accredited Social Health Activist) mi 79 te hnenah training pek a ni.

He training hi Dr.David Zothansanga, State Nodal Officer, NUHM-in a kaihruai a. Dr.Lalchhuanawma, SNO, Quality Assurance chuan ASHA kalphung leh vantlang hriselna chungchanga ASHA te mawhphurhna a sawifiahin zawhna leh chhanna hun hmanho a ni a,  ASHA ten harsatna hrang hrang an tawhte pawh sutkian a nih theih dan turte sawiho a ni. 

Vawiina training hi Urban PHC hnuaia ASHA te tan a vawi khatna a ni a. Urban Area (khawpui) chhunga ASHA ten an tih tur hrang hrangte inhrilhhriain, intuaitharna hun hman a ni a. Resource person atan ruat medical lama mithiam thlanchhuah Dr.Evelyn Lalremsangi, State Consultant(QA), leh State ASHA Trainers pahnih - Lalmuanpuii leh Lalthanzami ten thupui thlanchhuah hmangin an zirtir bawk. 

ASHA te hi nu leh naupai bakah nau pianghlim te an lo hrisel zawk theihna tur te, naupiang thihna leh nu nau chunga thihna ti hniam tur te, vantlang hriselna leh thianghlimna kawnga thawktu pawimawh tak an nih avangin NUHM chuan ASHA te chu nasa zawka an thiamna leh theihnate hmang tangkai turin mipuite a sawm a ni.

ASHA TE HMANG TANGKAI LA, HRISELNA KAWNGAH KE PEN ANG CHE.